Չնայած ստեղծված հանձնաժողովներին և իրականացվող բարեփոխումներին՝ անցած շրջանում ամենամեծ բացթողումը, ըստ Հայաստանի գործատուների միության նախագահ Գագիկ Մակարյանի, հավասար մրցակցություն ապահովել չկարողանալն է: «Առաջին լրատվական»-ի հետ զրույցում Գ. Մակարյանը փաստեց, որ ո՛չ հոգեբանորեն, ո՛չ էլ իրականում գործարարների համար հավասար մրցակցային պայմաններ չեն ստեղծվել:
«Տարիներ շարունակ փոքր բիզնեսի աճի դինամիկան նույն թիվն է մնում՝ 0.6-0.7 %: Այս 6-7 տարիների ընթացքում փակվող ձեռնարկությունները կազմել են գործողների 50 %-ը, և դա հիմնավորում են այն պատճառով, որ ամենամեռնող բիզնեսը միկրո և փոքր բիզնեսն է: Գործող կառավարությունը չկարողացավ այս խնդիրը լուծել՝ բոլոր բարեփոխումներով հանդերձ»,- ասաց Գ. Մակարյանը:
Նրա խոսքով՝ կիրառվում են բիզնեսի աջակցման տարբեր գործիքներ՝ արտահանմանն ուղղված արդյունաբերության, ավելի փոքր տոկոսադրույքների, ապահովագրության նոր մեխանիզմների ներդրման, բայց ուսումնասիրելով, թե ովքեր են ստանում այդ վարկերն ու աջակցությունը, անհավասար մոտեցում ենք տեսնում: Գ. Մակարյանը նշեց, որ կառավարությունը շատ զգուշավոր պետք է լինի, որ սելեկտիվ մոտեցման ճանապարհով նորից անհավասար մրցակցություն չառաջացնի. «ԱԱՀ հետաձգման կամ արտահանման խթանման մեխանիզմներ կիրառելով՝ այն ձեռնարկությունները, որ այդ արտոնություններից օգտվում են, մնում են որոշակի ցանկի շրջանակներում: Դա մեծ թիվ չի, և փոքր բիզնեսն այդտեղ չկա: Եվ երբ ավելի մանրակրկիտ դիտարկում ես, կան որոշակի կապեր, ու պատահական ձեռնարկություններ չեն»:
Գ. Մակարյանի գնահատականով՝ մեծ խնդիր է նաև զբաղվածության լուրջ խթանների առաջացման բացակայությունը. «Այն թվերը, որ կառավարությունը նախատեսում է ստեղծել 5 տարում՝ 75 հազ. աշխատատեղեր, դա շատ համեստ թվեր են: Հատկապես միկրոբիզնեսին ազատ թողնելով, չհարկելով, կամ ավելի գործունյա իրավիճակ ստեղծելով՝ կարելի է ավելի մեծ արդյունքի հասնել»:
Որպես երրորդ խնդիր՝ Գ .Մակարյանը նշեց արդարադատության բացակայությունն ու ոչ լիարժեքությունը մեր երկրում. «Դրա բացակայությունը խրտնեցնում է բոլորին՝ ներդրողներին և այլն: Մարդկանց հեռանալու պատճառներից մեկն էլ դա է»:
