Աշխարհահռչակ ռեժիսոր և երաժիշտ Էմիր Կուստուրիցան և «The No Smoking Orchestra» ֆոլք-ռոք խումբը Հայաստանում հնարավոր է համերգ ունենան: Այս մասին «Արմենպրես»-ի հետ զրույցում տեղեկացրել է խմբի Ռուսաստանի, Բալթյան և նախկին ԽՍՀՄ երկրների գծով մենեջեր Միրկո Ռադենովիչը` անդրադառնալով այն տեղեկատվությանը, թե խումբը հոկտեմբերի 31-ին համերգ է ունենալու Հայաստանում:
«Հոկտեմբերի 31-ի համերգը տեղի չի ունենա: Հնարավոր է նոյեմբերի վերջին համերգ լինի: Դեռ հարցականի տակ է: Երևի մոտավորապես նոյեմբերի 30-ին կկազմակերպվի: Վերջնական ժամկետը մոտ 2 շաբաթ անց հայտնի կլինի»,-նշեց նա:
Ավելի վաղ «The No Smoking Orchestra»-ի կայքըտեղեկատվություն էր տարածել, որ համերգը տեղի կունենա Կ. Դեմիրճյանի անվան մարզահամերգային համալիրում` հոկտեմբերի 31-ին:
Էմիր Կուստուրիցան եվրոպական խոշորագույն, այդ թվում` Կաննի փառատոնի մրցանակակիր է, արժանացել է բազմաթիվ պարգևների: Ռեժիսորը բազմաթիվ հայտնի կինոնկարների հեղինակ է: Բալկանյան կինոյի հանճարը նախորդ տարի տոնեց ծննդյան 60-րդ հոբելյանը: Բացի կինոյում աշխատելուց, Կուստուրիցան հայտնի է որպես «The No Smoking Orchestra» ֆոլք-ռոք խմբի անդամ: Էմիր Կուստուրիցան հասցրել է այցելել Հայաստան. նա եղել է «Ոսկե ծիրան» միջազգային փառատոնի հյուրը:
