Նախօրեին Ազատամարտիկների դաշինքի ընդլայնված խորհուրդը քննարկել և որոշել է հարգելով Սմբատ Հակոբյանի հորդորը՝ առայժմ ձեռնպահ մնալ ինքնադատաստանի գործողություններից, համապատասխան մարմիններից պահանջել դեպքի ամբողջական բացահայտում և պատվիրատուից մինչև կատարող բոլորին անխտիր պատասխանատվության ենթարկում:
«Իրավական համակարգի կողմից արված ոչ մի հայտարարության ես չեմ հավատացել, պարզապես մենք «թայմ աութ» վերցնելու քայլով ուզում ենք հստակեցնել՝ որևէ մարդ կանգնա՞ծ է այս ամենի մեջքին, թե՞ ոչ»,- «Առաջին լրատվական»-ի հետ զրույցում նշեց «Ազատամարտիկների դաշինքի» անդամ, «Ապարան» ջոկատի հրամանատար Ռազմիկ Պետրոսյանը՝ անդրադառնալով ազատամարտիկ Սմբատ Հակոբյանին ծեծի ենթարկելու փաստին։
«Մենք միշտ էլ ասել ենք, որ մեր ձևով մեղավորին պատժելու ենք, և ոչ ոք անպատիժ չի մնալու, բայց այս անգամ մեր ընկերն ուզում է, և մենք էլ ուզում ենք հստակեցնել, թե արդյոք իշխանությունների՞ հովանավորությամբ է սա տեղի ունեցել։ Մենք գիտենք, որ այդպես է, բայց ուզում ենք իմանալ՝ այս անգամ իշխանությունները մինչև վերջ բախման կգնա՞ն, թե՞ գոնե մի անգամ իրավացիորեն կպատժեն, որովհետև գործ ունենք սպանության փորձի հետ։ Եթե իշխանությունները հովանավորում են, նշանակում է իրենք են պատերազմ հայտարարել հասարակությանը»,- ասաց Ռազմիկ Պետրոսյանը։
Նրա խոսքով՝ իրենք ուզում են իմանալ՝ պայքարում են մի անհատի՞, մի կլանի՞, թե՞ իշխանական հովանավորությամբ գործող բանդայի դեմ։ «Եթե իմանանք իշխանությունը ողջ ազգին պատերազմ է հայտարարել, մենք մեր անելիքը կանենք։ Իսկ եթե 1-2 կամ 10-հոգանոց բանդա է, իշխանությունը հնարավորություն ունի նրանց վնասազերծելու։ «Բեսպրեդելն» այս երկրում չպիտի դառնա նորմ, իսկ եթե այդպես են ուզում, թող անեն։ Այս գործընթացն այդպես հանգիստ չի գնալու, և այս խմորը շատ ջուր է տանելու, եթե իշխանությունները հետևություններ չանեն»,- ասաց ազատամարտիկը։
Անդրադառնալով փաստին, որ Սմբատ Հակոբյանի ծեծից անմիջապես հետո ոստիկանապետը, նաև նախագահը զանգահարել ու հետաքրքրվել են նրա առողջությամբ, Ռազմիկ Պետրոսյանն ասաց. «Սկզբում իմ մոտ տպավորություն էր, որ իշխանությունները հակված են բացահայտելու մեղավորներին, բայց հետագա գործողությունները ցույց տվեցին, որ կարծես ոչ թե մենք ենք «թայմ աութ» վերցրել, այլ իրավապահ մարմիններն են ինչ-որ բանի սպասում։ Դրա համար այս պահին մենք որոշել ենք որևէ բան չանել, և հնարավորություն տանք իշխանություններին բացահայտելու կա՛մ այս հանցագործությունը, կա՛մ իրենց մասնակցությունն այս ամենին։ Եթե իշխանությունների կողմից որևէ քայլ չտեսանք, մենք մեր անելիքը կանենք»։
Նույն խնդրի առնչությամբ ազատամարտիկ Վլադիմիր Առաքելյանը նույնպես նշեց, որ այս դադարով իրենք ոչ մի բանից չեն հրաժարվում, ուղղակի քանի որ վարույթում է գտնվում գործը, թողնում են այն ընթանա։ Հարցին՝ ակնկալիք ունե՞ք, որ գործը կբացահայտվի, նա պատասխանեց. «Ես ոչ մեկից ոչ մի ակնկալիք չունեմ»։
Դիտարկմանը, թե Սմբատ Հակոբյանն արդեն ցուցմունք է տվել և նշել Ռուբեն Հայրապետյանի անունը, արդյոք իշխանությունը դեմ կգնա՞ Ռուբեն Հայրապետյանին, ազատամարտիկն արձագանքեց. «Ես չգիտեմ, ես ուզում եմ, որ ամեն մեկն իր արածի համար պատիժ կրի, ուղղակի սպասում ենք իշխանության քայլերին»։
Լուսանկարը` Առավոտ-ի
