Երևանում այսօր կմեկնարկի Վ. Փափազյանի անվան Շեքսպիրյան միջազգային թատերական փառատոնը, որն այս տարի նվիրված է փառատոնի համահիմնադիր շեքսպիրագետ, կյանքից վաղաժամ հեռացած Անջեյ Ժուրովսկու հիշատակին:
Այսօր լրագրողների հետ հանդիպմանը փառատոնի նախագահ Հակոբ Ղազանչյան ասաց, որ Անջեյ Ժուրովսկու հետ փառատոնը հիմնելուց հետո ներկայացումները տարբեր ժանրերում էին, սակայն ժամանակը ցույց տվեց, որ մոնո ժանրն այս պարագայում ամենալավն է:
Ինչպես նախորդ տարիներին, այս տարի ևս փառատոնն անցկացվում է Մշակույթի նախարարության հովանավորությամբ: Ասուլիսի մյուս բանախոս, ՀՀ մշակույթի նախարարության Արվեստի ժամանակակից վարչության մասնագետ Վարդան Գրիգորյանը ողջունեց ծրագիրը և ասաց, որ փառատոնին պետական աջակցությունը միանշանակ է, քանի որ խոսքը Շեքսպիրին է վերաբերում, ով ինչքան հին, այնքան էլ նոր է. «Մենք կարևորում ենք Հայաստանում անցկացվող բոլոր միջազգային փառատոները, Շեքսպիրյան փառատոնը հատկապես մեծ վարպետությամբ արվող և հայ հանդիսատեսին հետաքրքրող փառատոն է»:
Երևանում է նաև Անջեյ Ժուրովսկու այրին՝ Մալգորզատա Ալինա Ժուրովսկան, ով ևս թատերական քննադատ և լրագրող է: Նա նշեց, որ իր համար մեծ պատիվ է լինել Երևանում, միևնույն ժամանակ էլ՝ դժվար. «Երեկ լրացավ ամուսնուս մահվան երեք ամիսը: Առաջին անգամ չէ, որ Հայաստանում եմ, բայց մշտապես եկել եմ ամուսնուս հետ: Ամուսնուս և իմ կյանքը բարդ էր, որովհետև մենք նույն մասնագիտությունն ունեինք: Երբ ես սովորում էի, ստիպված էի նրա գրքերը կարդալ… Դժվար է ինչ-որ բան ասել, ամուսինս շատ մեծ կապ ուներ մոնո թատրոնի և Հայաստանի հետ, հուսով եմ՝ կապը երկու երկրների միջև կշարունակվի»:
Նշենք նաև, որ փառատոնը կտևի ութ օր՝ ապրիլի 6-ից 13-ը, որի ընթացքում արտասահմանցի և հայ դերասանները մոնո ներկայացմամբ կբեմադրեն աշխարհահռչակ դրամատուրգ Վիլյամ Շեքսպիրի ստեղծագործությունները:
