Վիեննայի գերագույն դատարանում սկսվել է Ավստրիայում Ղազախստանի նախկին դեսպան, հանրապետության նախագահի նախկին փեսա Ռահաթ Ալիևի գործով դատաքննությունը: Այս մասին հաղորդում է «Վրեմյա» ղազախստանյան թերթը: Պարբերականի տվյալներով` Ալիևը ներկա չի գտնվել գործընթացին:
Ավելի վաղ զոհված մենեջերների ընտանիքների փաստաբանը հայտարարել էր, որ Վիեննայի գերագույն դատարանը քաղաքական դրդապատճառներ չի գտել Ալիևի քրեական հետապնդման համար:
Ղազախստանի նախագահ Նուրսուլթան Նազարբաևի դստեր նախկին ամուսինը երկրի իշխանությունների կողմից մեղադրվում է ղազախստանյան «Նորբանկի» երկու թոփ-մենեջերների առևանգման և սպանության մեջ:
Ռահաթ Ալիևը մինչև 2001թ. եղել է Ղազախստանի ամենախոշոր գործարարներից մեկը և երկրորդ մարդը պետական անվտանգության մարմիններում: Ավելի ուշ նա տեղափոխվել է դիվանագիտական աշխատանքի, իսկ այնուհետև մեղադրվել մի շարք հանցագործություններում: Ալիևը պնդում է, որ հետապնդումները սկսվել են այն պատճառով, որ ինքը մտադիր է եղել առաջադրվել նախագահական ընտրություններում, իսկ քրեական գործերն օգտագործվել են իր բիզնեսը խլելու համար:
2008թ. Ղազախստանի դատարանը Ալիևին հեռակա կարգով դատապարտել է 40 տարվա ազատազրկման հայրենիքի դավաճանության, պետական հեղաշրջում կազմակերպելու և այլ մեղադրանքների համար: Ավստրիան հրաժարվել է արտահանձնել Ալիևին, քանի որ կարծում է, որ հայրենիքում նրա հանդեպ արդար դատավճիռ չի կայացվի:
