Հոգեբան Արկադի Մեհրաբյանի կարծիքով՝ հայ կանանց բոլոր խնդիրները սկսում են հոգեբանական կերպարի աղճատումից: Այսօր լրագրողների հետ հանդիպման ընթացքում նա ներկայացրեց հայ կանանց մի քանի խնդիրներ. «Առաջինը կենցաղային, սոցիալ-տնտեսական խնդիրներն են, երկրորդը՝ առաքինի տղամարդու կերպարի բացակայությունը»,- ասաց նա:
Հոգեբանը հավելեց, որ արևմուտքից ներմուծված գործարար կնոջ կերպարը մեր մենթալիտետին այնքան էլ համահունչ չէ, այդ պատճառով ամուսնական հարաբերություններում խնդիրներ կարող են առաջանալ զբաղված կնոջ, ընտանիքի հոգսերին քիչ ժամանակ տրամադրող կնոջ պատճառով:
Իրավաբան Գարիկ Սահակյանն իր հերթին նշեց, որ ամուսնալուծության եզրին կանգնած զույգերից հիմնականում կանայք են իրենց օգնությանը դիմում. «Կանանց 90 տոկոսը ամուսնու դավաճանության պատճառով է ուզում ամուսնալուծվել: Շատ հաճախ հանդուրժում են մեկ կամ երկու անգամ, սակայն զգում են, որ համբերության բաժակը լցվել է: Տղամարդիկ էլ հիմնականում ուզում են ամուսնալուծվել սիրո պակասի պատճառով, իսկ այդ ամենի մեջ իր հսկայական դերն ունի կինը»:
Մասնավորեցնելով իր միտքը՝ Գ. Սահակյանը նշեց, որ շատ կանայք մինչ ամուսնանալը հագնվում են նորաձև, հանդիպումներին գալիս են խնամված, սակայն ամուսնությունից հետո անցնում են «խալաթային» վիճակների, ինչն էլ հիասթափեցնում է տղամարդկանց. «Մենք հարցնում ենք տղամարդկանց, թե նախկինում չգիտեի՞ք, որ չեք սիրում Ձեր կնոջը, նրանք էլ պատասխանում են՝ ես գիտեի սիրում եմ, բայց հետո հասկացա, որ այն կինը չէ, որ պետք է իմ կողքին լինի, ես դեռ կգտնեմ այդպիսի մեկին»:
Հարցին՝ իրենց դիմո՞ւմ են տղամարդիկ, որոնց դավաճանել են կանայք, Գ. Սահակյանը պատասխանեց. «Առավել հաճախ կանայք են դիմում՝ ամուսինների դավաճանության պատճառով, կանանց դավաճանությունը քողարկված է, տղամարդիկ այդ մասին չեն սիրում խոսել»:
Ասուլիսի բանախոսները շնորհավորեցին գեղեցիկ սեռի ներկայացուցիչներին մայրության և գեղեցկության տոնի կապակցությամբ և նշեցին, որ հայ կանանց առաջին հերթին անհրաժեշտ է իսկական հայ տղամարդ:
