«Ի՞նչ է նշանակում՝ «իշխանությունը կիսել ժողովրդի հետ», եթե փորձենք քաղաքագիտական իմաստ գտնել դրա մեջ, պետք է ասենք հետևյալը՝ կամ հրաժարական և նոր ընտրություններ, ինչպես գրված է, կամ էլ իշխանության սահուն հանձնում ժողովրդին»,- «168 ժամի» թղթակցի հետ զրույցում ասաց քաղաքագետ Մանվել Սարգսյանը՝ խոսելով ՀՀ գործող նախագահ Սերժ Սարգսյանին «Բարևի» շարժման առաջնորդ Րաֆֆի Հովհաննիսյանի կողմից արված առաջարկի մասին:
Ըստ նրա՝ այդ առաջարկի հիմքում դրված է «կամ հիմա նախագահի հեռացում, կամ իշխանության սահուն փոխանցում հասարակությանը» տրամաբանությունը, սակայն այս առումով՝ Մանվել Սարգսյանը լավատես չէ: Քաղաքագետը նշեց նախկինում ընդդիմության և իշխանության միջև եղած երկխոսության նախադեպերը՝ հիշեցնելով, որ 2011թ. ՀԱԿ-իշխանություն երկխոսությունը բերեց նրան, որ շարժումն ամբողջովին մարեց, և ժողովուրդը դա չընդունեց: «Կարծում եմ՝ Սերժ Սարգսյանն ունի նույն խնդիրը, ինչ ունեցել է անցյալ ընտրություններում՝ օգտագործել ընտրական գործընթացը՝ ժողովրդին լիդերից կտրելու համար: Նույն մեթոդն է, դրա համար էլ շփումը բավական դժվար է գնում: Գիտակցվում է, որ ռեժիմն ընդամենը ցանկություն ունի նորից փորձել ժողովրդին ուղարկել տուն, մեկուսացնել առաջնորդին ու հետո ասել՝ «ոչ մի ընտրություն»»,- կարծիք հայտնեց Մ.Սարգսյանը:
