Վրաստանի վարչապետ Բիձինա Իվանիշվիլին գլխավորում է օֆշորային ընկերությունների սեփականատերերի թարմ ցուցակը, որը հրապարակվել է հինգշաբթի: Այս մասին գրում է բրիտանական The Guardian թերթը «Օֆշորների գաղտնիքները» հերթական հոդվածում, որոնք պատրաստվում են Լրագրողական հետաքննությունների միջազգային կոնսորցիումի (ICIJ) նյութերի հիման վրա: Ինչպես նշում է լրագրող Դևիդ Լին, ցուցակում տեղ են գտել գործիչներ Պակիստանից, Հնդկաստանից, Թայլանդից, Ինդոնեզիայից:
«Հիշատակված է նաև բրիտանացի Նեյլ Գեյթլին՝ ընկերության տնօրեն, որին անվանում են Իրանի վարչակարգի հովանավոր»,- ասվում է հոդվածում:
Լորդերի պալատի անդամ, լիբերալ-դեմոկրատ լորդ Օուքեշոթն արդեն հայտարարել է. «Ինչպե՞ս է Դևիդ Քեմերոնը զսպում ծիծաղը, երբ G8-ին կոչ է անում ստիպել մեծ բիզնեսին վճարել հարկերը: Չէ՞ որ մենք թույլ ենք տալիս բրիտանական Վիրջինյան կղզիներին օգտագործել բրիտանական օրենքները և Բրիտանիայի պաշտպանությունը՝ կեղտոտ փողերի միլիարդները լվանալու համար»:
Հոդվածում նշվում է, որ բրիտանական Վիրջինյան կղզիներում Բիձինա Իվանիշվիլին 2006-09 թթ. հաշվառված է որպես ընկերության տնօրեն, որը ղեկավարվում է Պանամայի գործակալի միջոցով և ակտիվ է մինչ օրս: Այնուհետև մեջբերվում է Իվանիշվիլիի մամլո քարտուղարի մեկնաբանությունները. «2011-2012թթ. հայտարարագրված ժամանակաշրջանում վարչապետ Իվանիշվիլին չի ունեցել սեփականատիրական իրավունք ընկերությունում (…), հետևաբար, պարտավորված չի եղել դրա մասին հաղորդել հայտարարագրում»:
Պարբերականը պնդում է նաև, որ Իրանի բեռների նավատորմը գործում է Tamalaris Consolidate d Ltd. օֆշորային ընկերության միջոցով, որը ստեղծվել է 2006թ. ռուսական ինկորպորատիվ գործակալության միջոցով: Ընկերության տնօրենն է բրիտանացի Նեյլ Գեյթլին: Հոդվածում նշվում է, որ 2011թ. ԱՄՆ-ը և Մեծ Բրիտանիան ընկերությունը ներառել են «սև ցուցակ»-ի մեջ՝ որպես Իրանի պետական նավային ընկերության հովանավոր:
