Երևանի քաղաքապետարանի ավագանու որոշումը՝ լրագրող, հաղորդավարուհի, դերասանուհի Զառա Արամյանին բնակարան նվիրելու վերաբերյալ, բուռն քննադատությունների առիթ տվեց: Ինքը՝ Զառա Արամյանը, «Առաջին լրատվական»-ի հետ զրույցում ասել է, որ դեռ պետք է քննարկվի և որոշում կայացվի ավագանու նիստի ընթացքում:
Մեզ հետ զրույցում Երևանի քաղաքապետարանի ավագանու ԲՀԿ խմբակցության ղեկավար Թամար Պողոսյանը նշեց, որ իրենք մեկ օր առաջ են ստացել որոշումը և այս հարցի վերաբերյալ որևէ մեկնաբանություն անել չեն կարող:
«Մենք դեռ չենք ուսումնասիրել, դա իրավական փաթեթ է: Մենք ուրբաթ օրը ավագանու նիստի ընթացքում մեր դիրքորոշումն այս հարցի վերաբերյալ կասենք: Դա բավականին լուրջ ուսումնասիրության փաթեթ է»,- ասաց Թամար Պողոսյանը: Իսկ հարցի ոչ թե իրավական, այլ բարոյական կողմի մասով Պողոսյանը դժվարացավ որևէ պատասխան տալ: «Դա կախված է, թե ինչ իրավական հիմքեր կան: Այս պահին չեմ կարող հստակ պատասխան տալ, քանի դեռ փորձագետները գնահատական չեն տվել»,- նշեց նա:
Ավագանու «Բարև Երևան» խմբակցության անդամ Դավիթ Սանասարյանը ևս հրաժարվեց այս հարցի առնչությամբ որևէ մեկնաբանությունից: Նա նշեց, որ ունի իր կարծիքը, բայց այն չի արտահայտի և կսպասի մինչև ավագանու նիստի օրը: Դիտարկմանը՝ կան շատ անօթևան ընտանիքներ, որոնց համար բնակարան ունենալը առաջնային խնդիր է, Դավիթ Սանասարյանը ընդգծեց. «Ընտանիքներ կան, այո: Բայց ես կրկնում եմ՝ չեմ ուզում իմ գնահատականները տալ, կսպասեմ խմբակցության վերջնական դիրքորոշմանը»:
Նշենք, որ Երևանի քաղաքապետարանը հոկտեմբերի 8-ի արտահերթ նիստում կքննարկի մի քանի քաղաքացիների բնակարան նվիրելու հարցը: Մարգարյան փողոցի 45 շենքում բնակարաններ կհատկացվեն Զառա Արամյանին (90,8 քմ մակերեսով), գրող Վահրամ Սահակյանին՝ (101,5 քմ մակերեսով), երգիչ Դավիթ Ամալյանին և Ալ. Սպենդիարյանի անվան օպերայի և բալետի ազգային ակադեմիական թատրոնի մեներգիչ Բերջ Քարազյանին: