Մայրաքաղաքի Մալաթիա-Սեբաստիա վարչական շրջանի ղեկավար Արտակ Ալեքսանյանը համոզված է, որ ամենադժվար խնդիրն անգամ հաղթահարելի է, երբ կողքիդ կան սրտացավ ու բանիմաց մարդիկ:
Պարոն Ալեքսանյան, դուք մայրաքաղաքի վարչական շրջանների ղեկավարներից ամենաերիտասարդն եք, դժվար չէ՞ աշխտանքը:
Յուրաքանչյուր աշխատանք ունի իր դժվարությունն ու եթե դժվարությունից վախենանք, ապա որևէ աշխատանք, այդ թվում նաև ղեկավարել՝ չի ստացվի: Այո, դժվար, նաև պատասխանատու աշխատանք է, սակայն եթե կա նորմալ, աշխատունակ, հստակ ռազմավարություն ունեցող թիմ, որի անդամն ես և ունես սրտացավ ու բանիմաց գործընկերներ, ապա ամենադժվար խնդիրն էլ հաղթահարելի է: Բարեբախտաբար իմ պարագայում երկուսն էլ կա:
Հաշված օրեր են մնացել մայրաքաղաքի տոնին, ինչպե՞ս եք նախապատրաստվել:
Ամեն տարվա նման այս տարի էլ մեր վարչական շրջանը տոնակատարության ամենաակտիվ մասնակիցներից է լինելու և ես վստահ եմ, որ Մալաթիա-Սեբաստիայի յուրաքանչյուր բնակիչ մեծ ուրախությամբ ու ոգևորությամբ իր մասնակցությունն է բերելու մեր սիրելի քաղաքի տոնին: Իսկ ոգևորվելու առիթ մեր բնակիչներն իսկապես ունեն, քանի որ բոլորն են տեսնում, թե համաքաղաքային ու վարչական շրջանի ծրագրերով տարեցտարի որքան ծավալուն աշխատանքներ են իրականացվում մեր վարչական շրջանում: Երբ բնակիչը տեսնում է, թե ինչպես տարիներ շարունակ անխնամ մնացած իր բակը գեղեցիկ, լուսավոր ու հարմարավետ է դարձել ոչ միայն իր երեխայի, այլ նաև հենց իր համար, ապա չուրախանալ ուղղակի հնարավոր չէ: Բացի այդ, մեր բնակիչն ուրախանում ու ոգևորվում է, երբ տեսնում է, որ տարեց տարի ակնհայտորեն ավելանում ու ընդարձակվում են իրեն շրջապատող կանաչ ու ծաղկապատ տարածքները: Վստահաբար կարող եմ ասել, որ մեր վարչական շրջանում գրեթե չկա մի ընտանիք, որ այս կամ այն կերպ չօգտվի իրականացվող համաքաղաքային ու տեղական ամենատարբեր ծրագրերից կամ չզգա ու չտեսնի դրանց արդյունքը:
Ի՞նչ կասեք վարչական շրջանի գործընկերային կապերի մասին:
Հավանաբար տեղյակ եք, որ Երևանի քաղաքապետ Տարոն Մարգարյանի հանձնարարությամբ մայրաքաղաքի բոլոր վարչական շրջանները սերտորեն համագործակցում են Հայաստանի տարբեր մարզերի, ինչպես նաև ԼՂՀ շրջանների հետ: Մալաթիա-Սեբաստիան, բնականաբար, նույնպես ակտիվորեն ներգրավված է այդ գործընթացում և, ասեմ ավելին, ջանում ենք հնարավորին ավելի ընդլայնել ինչպես բարեկամ ու գործընկեր շրջանների քանակն ու աշխարհագրությունը, այնպես էլ համագործակցության ծրագրերը՝ բովանդակային առումով: Ի դեպ, քանի որ մեր զրույցի առիթը մայրաքաղաքի տոնն է, նշեմ, որ մեր հրավերով բարեկամ շրջաններց երեխաներ կգան Երևան՝ ծանոթանալու մեր մայրաքաղաքին և մասնակցելու «Էրեբունի-Երևան» տոնակատարությանը:
Ի՞նչ կավելացնեք:
Ավելացնելու, ըստ էության, շատ բան կա, բայց քանի որ առջևում մեր բոլորի սիրելի Երևանի տոնն է, կուզենայի շնորհավորել Մալաթիա-Սեբաստիա վարչական շրջանի և, ընդհանրապես, աշխարհի բոլոր հայերին՝ մեր ջերմ ու բարի մայրաքաղաքի ծննդյան օրվա առթիվ: Սիրենք մեր քաղաքը, խնամենք և հոգ տանենք նրա մասին ու շատ շուտով այն կդառնա աշխարհի ամենագեղեցիկ ու լավ մայրաքաղաքը: Թեև, անկեղծ ասած, ինձ համար Երևանը միշտ էլ ամենալավն է աշխարհում: