«Այս սահմանադրական փոփոխությունները հարվածում են նաև որոշ հանրապետականների շահերին: Հայաստանում կար 3 ազդեցիկ պաշտոն՝ նախագահի, վարչապետի և ԱԺ նախագահի: Այսօրվա սահմանադրական փոփոխությունների փիլիսոփայությամբ՝ նախագահի պաշտոնը դառնում է ձևական, վարչապետի պաշտոնը բավական թուլանում է, մնում է մեկ պաշտոն՝ ԱԺ նախագահի: Եվ որոշ հանրապետականներ, որոնք հույս ունեին 2018-ից հետո քաղաքական կարիերա անել, նրանց ճանապարհը փակվում է»,- «Առաջին լրատվական»-ի հետ զրույցում իր կարծիքը հատնեց Քաղաքական և ընտրական տեխնոլոգիաների փորձագետ Արմեն Բադալյանը:
Անդրադառնալով այն տեսակետին, որ սահմանադրական փոփոխություններն արվում են՝ կանխելու համար Ռոբերտ Քոչարյանի վերադարձը մեծ քաղաքականություն՝ Արմեն Բադալյանն ասաց. «Թե ով կլինի նախագահի պաշտոնում, այսպես թե այնպես, Մոսկվան էր որոշելու, այսինքն՝ եթե Մոսկվան ցանկանար նրա վերադարձը, ապա այս փոփոխությունները թույլ չէին տա անցկացնել: Այս փոփոխություններից հետո երկրորդ նախագահը եթե փորձի վերադառնալ, վերադառնալու է որպես շարքային կուսակցության ղեկավար, որը, բնականաբար, խորհրդարանում մեծամասնություն չի կազմելու: Ուստի խիստ կասկածելի է նրա վերադարձը»:
Ինչ վերաբերում է հասարակության մեծ զանգվածների պայքարին՝ ընդդեմ սահմանադրական փոփոխությունների, ապա Արմեն Բադալյանն ասաց. «Ոչ այսօրվա Սահմանադրությունն է գործում, ոչ նախորդն է գործել, ոչ էլ ապագան է գործելու: Այսինքն՝ այս Սահմանադրության հարցը ժողովրդի հետ առնչություն չունի: Ուրեմն ժողովուրդը դուրս գա պայքարի, որ ի՞նչ անի»:
Արմեն Բադալյանի կարծիքով՝ այս սահմանադրական փոփոխություններն իրականացվում են ոչ թե իշխանությունների, այլ կոնկրետ մեկ մարդու վերարտադրության համար, քանի որ այդ մարդը 2018-ին այլևս չի կարող նախագահ առաջադրվել:
Անդրադառնալով Ազգային ժողովում սահմանադրական փոփոխությունների քվեարկության ժամանակ ԲՀԿ-ի դիրքորոշմանը՝ Արմեն Բադալյանն ասաց. «Փետրվարյան հայտնի դեպքերից հետո ԲՀԿ-ն դարձավ ՀՀԿ-2, քանի որ այդ կուսակցությունն առանց նախագահականի աջակցության այլևս չի կարող անցնել խորհրդարան: Քանի որ Հայաստանում ընտրությունների ինստիտուտը այլևս չի աշխատում, ցուցակը կազմվելու է նախագահականում»:
