«Ռուբի» մականունով ծագումով Մարոկկոյից Քարիմա Ալ-Մարուգը, որի անունը կցված է Իտալիայի նախկին վարչապետ Սիլվիո Բեռլուսկոնիի դեմ աղմկալի դատական գործընթացին, այսօր բողոքի ակցիա է անցկացրել Միլանի դատարանի շենքի առջև: Հիշեցնենք, որ Բեռլուսկոնին մեղադրվում է անչափահաս մարմնավաճառի ծառայություններից օգտվելու մեջ: Այս մասին հայտնում է Corriere della Sera-ն:
Աղջիկը դատարանին է մոտեցել միայնակ՝ առանց փաստաբանների, և իտալերենով կարդացել տեքստ, որում բողոք է արտահայտել դատավորներին և փաստաբաններին առ այն, որ ինքը դատարանի դահլիճում որպես վկա ելույթ ունենալու հնարավորություն չի ունեցել:
«Ես ամաչելու և թաքցնելու ոչինչ չունեմ: Ես խնդրում եմ, որպեսզի միլանցի դատավորները լսեն ինձ, հուսով եմ՝ նրանք կկանչեն ինձ… Ես մարմնավաճառ չեմ… Հարվածելով Բեռլուսկոնիին՝ ԶԼՄ-ները վատություն արեցին նաև ինձ»,-ասել է Ռուբին՝ հավելելով, որ ներողություն է խնդրում նախկինում ասված ստի համար, որն իրեն անհրաժեշտ էր զուգահեռ կյանքի ստեղծման համար, որը տարբերվում էր իր վարած աղքատ գոյությունից:
Դատական գործընթացը Բեռլուսկոնիի դեմ սկսվել է 2011-ի ապրիլին: Քննության վարկածով՝ քաղաքական գործիչն ինտիմ կապ է ունեցել Ռուբիի հետ, որի 18 տարին դեռևս չէր լրացել, դրա դիմաց նա ստացել է նվերներ և դրամական պարգևատրում:
Դատավարությունը, որը եզրափակիչ փուլում է, ձգձգումներից հետո կվերսկսվի ապրիլի 20-ից հետո:
Սկզբում Ռուբին լսումներին պետք է ելույթ ունենար որպես պաշտպանության վկա, սակայն նշանակված օրը նա չի հայտնվել, քանի որ հանգստի նպատակով գտնվել է Մեքսիկայում: Դրանից հետո Բեռլուսկոնիի փաստաբանները՝ Միլանի դատախազության հետ համաձայնությամբ, որոշել են նրան երկրորդ անգամ դատարան չկանչել՝ փոխարենն օգտագործելով ցուցմունքները, որ նա տվել էր նախաքննության ընթացքում:
