ԱՄՆ նախագահ Բարաք Օբաման երկուշաբթի հաստատել է Անդրխաղաղօվկիանոսյան առևտրային գործընկերության վերաբերյալ 12 կողմանի համաձայնագրի կնքումը և դրա հետ կապված՝ հայտարարել է, որ համաշխարհային առևտրի կանոնները Ամերիկան կգրի, ոչ թե ուրիշ մեկը, օրինակ՝ Չինաստանը: Այս մասին հայտնում է RIA Novosti-ն:
Անդրխաղաղօվկիանոսյան գործընկերության շրջանակներում ազատ առևտրի գոտի կստեղծվի Ասիա-Խաղաղօվկիանոսյան տարածաշրջանում: Խաղաղօվկիանոսյան երկրներին բաժին է ընկնում համաշխարհային տնտեսության 40%-ը և համաշխարհային առևտրի մեկ երրորդը: համաձայնագրի անդամներն են՝ ԱՄՆ-ը, Կանադան, Մեքսիկան՝ Հյուսիսային Ամերիկայում, Պերուն և Չիլին՝ Հարավայինում, Մալայզիան, Բրունեյը, Վիետնամը և Սինգապուրը՝ Ասիայում, ինչպես նաև Ավստրալիան և Նոր Զելանդիան:
«Երբ մեր պոտենցիալ հաճախորդների ավելի քան 95%-ն ապրում է մեր սահմաններից դուրս, մենք չենք կարող երկրներին, ինչպիսին Չինաստանն է, թույլ տալ գրել գլոբալ տնտեսության կանոնները: Մենք պետք է գրենք այդ կանոնները՝ նոր շուկաներ բացելով ամերիկյան արտադրանքի համար և բարձր չափանիշներ սահմանելով աշխատողների պաշտպանության և շրջակա միջավայրի պահպանության համար: Այսօր Ատլանտայում ձեռք բերված համաձայնագիրը կապահովի դա»,- հայտարարել է Օբաման:
Նա նաև հավաստիացրել է, որ համաձայնագիրը ԱՄՆ-ում աշխատատեղերը և շրջակա միջավայրը կպաշտպանի «ավելի, քան որևէ այլ համաձայնագիր պատմության մեջ»: