2012թ. Վրաստանի նախագահ Միխեիլ Սաակաշվիլիի շրջապատը զենք է տրամադրել մի խումբ չեչենների և խոստացել է նրանց ուղարկել Ռուսաստան: Ինչպես հաղորդում է Interfax-ը, այս մասին հայտարարել է չեչեն անջատողականների էմիսար Ահմեդ Զաքաևը, որը ներկայում ապրում է Մեծ Բրիտանիայում:
«Սաակաշվիլիին մոտ կանգնած մարդիկ Եվրոպայից մի խումբ չեչենների են բերե, նախապատրաստել են նրանց, զենք տրամադրել և պետք է ապահովեին անվտանգ միջանցք՝ Դաղստանի տարածք անցնելու համար»,- ասել է Զաքաևը:
Նրա խոսքերով՝ ինքը տեղյակ է, որ Վրաստանի օմբուդսմեն Ուչա Նանուաշվիլին մի քանի օր առաջ հրապարակել է ամենամյա զեկույց, որում նախկին իշխանությունների ներկայացուցիչներին մեղադրել է Դաղստան ուղարկելու նպատակով մի խումբ չեչենների ռազմական նախապատրաստության մեջ:
Օմբուդսմենի զեկույցում խոսքը մասնավորապես վերաբերում է Վրաստանի ՆԳՆ-ի և պաշտպանության նախարարության հատուկ գործողությանը, որն անցկացվել է անցած տարի Վրաստանի և Ռուսաստանի սահմանի մոտ: Այդ գործողության ընթացքում սպանվեց 11 գրոհային և վրացի 3 զինվորական:
Վրաստանի ՆԳՆ այն ժամանակվա ղեկավարության տարբերակի համաձայն՝ չեչենները Վրաստանի տարածք էին ներխուժել Դաղստանից և սպանվել զինված դիմադրության ժամանակ:
