Հայաստանի հետ Թուրքիայի սահմանի բացումը հնարավոր է միայն Ադրբեջանի հետ համաձայնեցումից հետո: Այս մասին Trend-ի հետ զրույցում ասել է Թուրքիայի նախկին արտգործնախարար Հիքմեթ Չեթինը:
Նրա խոսքով՝ Ադրբեջանի և Թուրքիայի միջև առկա են շատ սերտ հարաբերություններ, և Թուրքիան չի կարող միակողմանի բացել Հայաստանի հետ սահմանը:
«Թուրքիայի և Ադրբեջանի միջև գոյություն ունեն հատուկ հարաբերություններ: Ոչ ոք դրանք չի բնութագրել ավելի լավ, քան մեծն առաջնորդ Հեյդար Ալիևը. «Մեկ ժողովուրդ՝ երկու պետություն»: Հայաստանի հետ Թուրքիայի սահմանը չի կարող բացվել միակողմանի: Դա շատ կարևոր է Հարավային Կովկասի երկրների հետ հարաբերությունների պլանում, մասնավորապես՝ Ադրբեջանի: Սահմանը բաց էր դեռ այն ժամանակ, երբ ես արտգործնախարար էի: Սակայն մենք փակեցինք այն, երբ Հայաստանը օկուպացրեց Լեռնային Ղարաբաղն ու հարակից շրջանները: Հայաստանի հետ Թուրքիայի սահմանի բացումը հնարավոր է միայն Ադրբեջանի հետ համաձայնեցումից հետո: Թուրքիայում չի կարող ընդունվել որոշում, որը կվնասի Ադրբեջանին»,- ասել է Չեթինը:
Անդրադառնալով Երևան-Վան ավիաչվերթի բացման հարցին՝ նախկին նախարարը նշել է, որ դա մասնավոր ընկերության որոշումն է, ոչ թե թուրքական կառավարության քաղաքականությունը:
«Թուրքիան բաց երկիր է, և մասնավոր ընկերությունները կարող են ընդունել ցանկացած որոշում: Սակայն տեսնելով, որ այդ հարցն անհանգստացրել է Ադրբեջանին, նրանք կասեցրել են այդ որոշումը»,- ասել է Չթին:
Նրա խոսքով՝ տարածաշրջանում պարտադիր պետք է խաղաղություն հաստատվի: Սակայն այդ խաղաղությունը պետք է համապատասխանի միջազգային իրավունքների և ՄԱԿ-ի որոշումներին:
«Լեռնային Ղարաբաղի հակամարտությունը պետք է լուծվի փուլ առ փուլ: Առաջին փուլում առնվազն պետք է ազատագրվեն Լեռնային Ղարաբաղին կից 5 շրջանները: Դա կդառնա հակամարտության կարգավորման առաջխաղացման նշան»,- ասել է Չեթինը:
