Քաղաքական խորհրդատու Ռոջեր Սթոունը, որը եղել է ԱՄՆ նախագահի օգնականը Ռիչարդ Նիքսոնի օրոք, գրել է The Clintons’ War On Women գիրքը՝ Քլինթոն ընտանիքում ընտանեկան բռնության թեմայով: Այս մասին հայտնում է New York Post-ը:
Ինչպես գրում է պարբերականը, գրքի հեղինակը պնդում է, որ Հիլարի Քլինթոնի դաժան վերաբերմունքն իր ամուսնու հանդեպ արդեն երկար ժամանակ է ձգվում:
Ամերիկյան ընտրազանգվածին իր բնավորության առավել մեղմ կողմերը ցույց տալու Քլինթոնի փորձերի ֆոնին Սթոունը գրում է, որ նախկին առաջին տիկինն իրականում «հակված է կատաղության պոռթկումների ամուսնու և նույնիսկ Գաղտնի ծառայության աշխատակիցների հանդեպ»:
Մասնավորապես, Սթոունը պնդում է, որ Քլինթոնը «ամուսնուն ծեծել է կոշտ առարկաներով, ճանկռել է եղունգներով՝ ընդհուպ մինչև արնահոսություն»՝ գրում է New York Post-ը:
Գրքում բերվում է Բիլ Քլինթոնի այտին մեծ քերծվածքի հայտնվելու պատմությունը 1993թ. մարտին Բարբարա Սթրեյզենդի հետ նրա հանդիպումից հետո: Սթոունը գրում է, որ Հիլարի Քլինթոնը սկանդալ է սարքել այդ կապակցությամբ, իսկ մամլո ծառայության պաշտոնական մեկնաբանության մեջ ասվել է, որ Բիլ Քլինթոնը սափրվելիս դեմքը վնասել է:
Գիրքն ԱՄՆ-ում վաճառքի կհանվի հոկտեմբերի 13-ին:
