ՀՀ-ում չկա կոռուպցիայի դեմ պայքարի միասնական մոտեցում: Այս մասին այսօր լրագրողների հետ հանդիպման ժամանակ ասաց Երևանի հակակոռուպցիոն կենտրոնի համակարգող Մարատ Ատովմյանը՝ խոսելով Երևանում տիրող կոռուպցիոն իրավիճակի, իրականացվող հակակոռուպցիոն միջոցառումների մասին:
Նա նշեց, որ Երևանում և մարզերում տեղակայված հակակոռուպցիոն կենտրոնները բողոք ունեցող քաղաքացիներին տրամադրում են անվճար իրավաբանական խորհրդատվություն, անհրաժեշտության դեպքում՝ փաստաբան, որը գործը շարունակում է դատական ատյաններում: Ըստ բանախոսի՝ իրականացվում են նաև հանրային իրազեկման աշխատանքներ, կազմակերպվում են քննարկումներ և կոնֆերանսներ՝դրանով իսկ նպաստելով ոլորտի բարեփոխումներին:
«2012թ. օգոստոսից փետրվար Երևանի հակակոռուպցիոն կենտրոն է դիմել 643 քաղաքացի, որոնց բողոքներից 107-ը հատկորոշվել են որպես կոռուպցիոն, իրավապահ մարմիններին հասցեագրել ենք 13 գործ, դատարանում կա 10 գործ: Հիմնական բողոքները վերաբերում են սոցիալական ապահովության ոլորտին՝ կենսաթոշակներին, բժշկասոցիալական փորձաքննություններին՝ հաշմանդամի կարգավիճակի շնորհման համար, խնդրահարույց ոլորտներից են հետաքննչական, նախաքննական մարմինների աշխատանքը: Շատ են դժգոհությունները քննիչներից, որոնք խախտում են դատավարական իրավունքները, ժամկետները, մենք ունենում ենք բազմաթիվ բողոքներ անձնագրային բաժանմունքների աշխատանքների հետ կապված, բողոքներ են եղել նաև փաստաբանների դեմ, որոնք վնաս են տալիս իրենց վստահորդին:
Դատարաններից ունենք դժգոհություններ, Դատական ակտերի հարկադիր կատարման ծառայությունից, հարկային մարմիններից, քաղաքացիական ակտերի գրանցման գրասենյակներից, հանրային ծառայություններ մատուցող որոշ կազմակերպություններից, առողջապահության ոլորտից»,- նշեց Մարատ Ատովմյանը՝ շարունակելով, որ կենտրոն դիմելու երկու ձև կա. քաղաքացիները կարող են այցելել գրասենյակ, որտեղ կարող են բողոքը ներկայացնել գրավոր կամ կարող են գործող թեժ գծերի միջոցով կապ հաստատել և իրազեկել խնդրի մասին:
Ամփոփելով իր խոսքը՝ բանախոսն ասաց, որ երկրում կոռուպցիայի դեմ պայքարի միասնական մոտեցում գոյություն չունի. տարբեր նախարարություններ իրենց հասցեագրված խնդիրներին տարբեր կերպ են ընթացք տալիս:
Լրագրողներին մարզերում տիրող իրավիճակը ներկայացրին Տավուշի հակակոռուպցիոն կենտրոնի համակարգող Վահագն Թամրազյանը, Լոռու հակակոռուպցիոն կենտրոնի համակարգող Արթուր Սուքիասյանը, Շիրակի հակակոռուպցիոն կենտրոնի համակարգող Գայանե Գևորգյանը: Նրանք բոլորը նշեցին, որ խնդիրները և ոլորտները, որտեղ իրավունքներ են խախտվում նույնն են, ինչ Երևան քաղաքում, իսկ իրենք պատրաստակամ ընդունում են բողոքներ ունեցող քաղաքացիներին, և եթե բողոքն արդարացի է, տանում են այն մինչև վերջ:
Տեղեկացնենք, որ դեռևս 2008թ. սկսած ԱՄՆ Միջազգային զարգացման գործակալության ֆինանսական օժանդակությամբ «Կասալս ենդ Ասոշիեյթս» միջազգային զարգացման և ռազմավարական հաղորդակցության ընկերությունը իրականացրեց Հակակոռուպցիոն գործողությունների մոբիլիզացման ծրագիր, որի շրջանակներում Հայաստանում սկսեցին գործարկվել առաջին ՇՊԱԿ-ները: Դրանց թվում էին`
Երևանի ՇՊԱԿ-ը. գործարկում էր Թրանսփարենսի Ինթերնեյշընլ հակակոռուպցիոն կենտրոնը,
Լոռու ՇՊԱԿ-ը. գործարկում էր Հելսինկյան քաղաքացիական ասամբլեայի Վանաձորի գրասենյակը:
Շիրակի ՇՊԱԿ-ը. գործարկում էր Գյումրիի Ժուռնալիստների «Ասպարեզ» ակումբը:
Տավուշի ՇՊԱԿ-ը. գործարկում է Հայաստանի երիտասարդ իրավաբանների ասոցիացիան:
Սյունիքի ՇՊԱԿ-ը. գործարկում էր Սյունիքի քաղաքացիական հասարակության զարգացման կենտրոնը:
Լուսանկարը՝ PanARMENIAN Photo-ի
