Տղամարդիկ լիովին պարտվում են սեռերի պայքարում: Նման հայտարարություն է արել ավստրալացի կին գիտնական Ջենի Գրեյվսը: Նրա խոսքով՝ տղամարդիկ, որպես տեսակ, 5 միլիոն տարի հետո կվերանան, քանի որ տղամարդու գեների համար պատասխանատու Y քրոմոսոմը թույլ է և գտնվում է կործանման փուլում: Այս մասին հայտնում է The Daily Mail-ը:
Գրեյվսի խոսքով՝ կանանց X քրոմոսոմը պարունակում է շուրջ 1000 գեն: Ինչպես հայտնի է՝ կանայք ունեն երկու X քրոմոսոմ: Y քրոմոսոմն ունեցել է նույնքան գեն, որքան կանանց քրոմոսոմը: Հարյուր միլիոնավոր տարիների ընթացքում այն քայքայլվել է՝ ժամանակակից տղամարդուն թողնելով 100-ից պակաս գեն: Դրանցից մեկը SRY գենն է, որը որոշում է պտղի սեռը:
Երկու X քրոմոսոմի առկայությունը վնասված գեները փոխարինում է: Y քրոմոսոմը նման զույգ չունի, այդ իսկ պատճառով քրոմոսոմի վնասված հատվածները հնարավոր չէ փոխարինել: Դրա համար էլ տեղի է ունենում գեների անկում: Հրապարակային ելույթի ժամանակ նա կատակել է՝ ասելով, որ տղամարդկանց վերացման գործընթացը սկսվել է: «Ոմանց մոտ դա ակնհայտ է նույնիսկ առանց քրոմոսոմի հատուկ ստուգման»,- ասել է նա:
Այլ փորձագետներ նշում են, որ 5 կամ 6 մլն տարին բավարար է բժշկության զարգացման համար, ինչը թույլ կտա կարգավորել խնդիրը:
