Հայտնի են դարձել ամենահուսալի ավտոմեքենաները: Համապատասխան վարկանշային աղյուսակը կազմել է Գերմանիայի տեխնիկական վերահսկողություն միությունը (TÜV)՝ հիմք ընդունելով ավելի քան 8,5 միլիոն ավտոմեքենաների տեխնիկական վերազննության արդյունքները, հայտնում է kermo.info-ն:
Փորձագետները բոլոր ավտոմեքենաները բաժանել են մի քանի խմբի` կախված մեքենայի տարիքից: Ինչպես պարզվել է, 2-3 տարեկան ավտոմեքենաների մեջ ավելի հուսալի են գերմանական ապրանքանիշերը` Mercedes-Benz, BMW, Audi և Porsche: Այսպես, «երեք տարեկանների» մեջ հինգ լավագույն մեքենաներն են եղել Mercedes SLK-ն, Audi-ն A6-ը, Mercedes GLK-ը, Porsche 911-ը և BMW Z4-ը:
Սակայն տարիքի հետ գերմանական մեքենաները հուսալիությամբ սկսում են զիջել ճապոնականներին: Օրինակ՝ 4-5 տարեկան ավտոմեքենաների մեջ առաջին երեք տեղերը զբաղեցրել են Mazda 3, Toyota iQ և Toyota Avensis մեքենաները:
Մեքենաների ավելի հին խմբերում գերակշռում են ճապոնական բրենդները: Օրինակ՝ 6-7 տարեկան խմբում երկրորդ տեղը գրավել է Mazda 2-ը, իսկ չորրորդը` Toyota Auris-ը: 8-9 տարեկան մեքենաների մեջ երկրորդ, երրորդ և չորրորդ տեղը գրաված ամենահուսալի մեքենաներն են եղել Toyota Corolla Verso-ն, Toyota RAV 4-ը և Mazda 2-ը: Իսկ 10-11 տարեկանների մեջ «ճապոնացիներն» ընդհանրապես զբաղեցնում են երկրորդից ութերորդ տեղերը` Subaru Forester, Toyota RAV 4, Toyota Avensis, Honda Jazz, Toyota Corolla, Mazda 2 և Toyota Yaris:
