ԱՄՆ Կոլորադո նահանգի դատախազությունը Ջեյմս Հոլմսի համար մահապատիժ կպահանջի: Նա անցած ամառ Բեթմենի մասին ֆիլմի պրեմիերային 12 մարդ էր սպանել: Այս մասին գրում է Reuters գործակալությունը:
«Ջեյմս Հոլմսի համար ամենաարդար պատիժը մահապատիժն է»,- հայտարարել է դատախազ Ջորջ Բրոշլերը Սենթենիալ քաղաքի դատարանում, որտեղ օգոստոսի 5-ին կսկսվի դատական գործընթացը:
Մեղադրող կողմը այսպիսի որոշում է կայացրել, չնայած որ Հոլմսի փաստաբաններն անցած շաբաթ հայտարարել էին, որ իրենց պաշտպանյալը մահապատժից խուսափելու համար պատրաստ է խոստովանել իր մեղքը:
Հոլմսը մեղադրվում է ծանր հանգամանքներով կանխամտածված սպանության մեջ: Կոլորադո նահանգի օրենսդրության համաձայն՝ այս հոդվածով մեղադրվող մարդուն ցմահ բանտարկություն կամ մահապատիժ է սպառնում:
