Եգիպտոսի գերագույն վարչական դատարանը մերժել է փաստաբանների բողոքը, որոնք պահանջել են անօրինական համարել 2011թ. փետրվարին Եգիպտոսի նախկին նախագահ Հոսնի Մուբարաքի հրաժարականը: Ինչպես հաղորդում է «Գոլոս Ռոսիի» ռադիոկայանը, այսպիսով` դատարանը վերջնականապես հաստատել է, որ Եգիպտոսի նախկին առաջնորդը չի կարող վերադառնալ իշխանություն:
«Դատարանը հրաժարվել է քննել նախագահի պաշտոնից Մուբարաքի անօրինական հրաժարականի և պետության ղեկավարի պաշտոնը կրկին ստանձնելու հավանականության հարցով բողոքը»,- մեկնաբանել են Եգիպտոսի գերագույն վարչական դատարանում: Դատարանի ներկայացուցչի խոսքերով՝ Մուբարաքի օրինական հեռացման, ինչպես նաև նախագահի պաշտոնին վերադառնալու վերաբերյալ գործում վերջակետ է դրվել:
Դատարանի որոշումը բողոքարկման ենթակա չէ:
Նշենք, որ փաստաբանների հայցը հիմնված էր այն հանգամանքի վրա, որ Մուբարաքի հրաժարականի մասին ազգային հեռուստատեսությամբ հայտարարել է Եգիպտոսի փոխնախագահ Օմար Սուլեյմանը, սակայն նախկին նախագահն անձամբ որևէ հայտարարություն չի արել այս կապակցությամբ: Բացի այդ, չկա Մուբարաքի կողմից ստորագրված որևէ պաշտոնական փաստաթուղթ երկրի ղեկավարի պաշտոնը թողնելու անձնական համաձայնության մասին: