ԱՄՆ-ի և Կուբայի կառավարությունների պաշտոնատար անձինք ծրագրում են սեպտեմբերի 28-29-ը երկու երկրների միջև ավիահաղորդակցության նորմալացմանը նվիրված խորհրդակցություններ անցկացնել՝ հաստատել է ԱՄՆ Պետդեպի մամլո ծառայությունը: Այս մասին հայտնում է TASS-ը:
Նա նշել է, որ «քաղաքացիական ավիացիայի վերաբերյալ տեխնիկական բանակցությունների» համար Հավանա է թռչում ամերիկյան միջգերատեսչական պատվիրակությունը: Այն կգլխավորի ԱՄՆ պետքարտուղարի էկոնոմիկայի և բիզնեսի հարցերով օգնական Չարլզ Ռիվկինը:
«Կուբայի հետ թույլատրված տրանսպորտային հաղորդակցության ընդլայնումը նախագահի (Բարաք Օբամայի) նոր քաղաքականության ուշադրության կենտրոնում է»,- նշել է ԱՄՆ արտաքին քաղաքական գերատեսչությունը: Նրա տեղեկությամբ՝ Ռիվկինը և պատվիրակության նրա գործընկերները հանդիպումներ կունենան «կուբացի գործընկերների հետ՝ ուսումնասիրելու երկու երկրների միջև պլանային օդային հաղորդակցություն հաստատելու հնարավորությունները, նաև քննարկելու ավիացիոն անվտանգության հարցեր»:
Ներկայումս ամերիկյան օրենսդրությունն «արգելում է զբոսաշրջային նպատակներով Կուբա ուղևորությունները»՝ հիշեցրել է ԱՄՆ Պետդեպը: