Գյուղացիների դժգոհություններից, բողոքի ակցիաներից ու ավտոճանապարհը փակելուց հետո միայն մեկնարկել է խաղողի մթերման գործընթացը: Առաջին լրատվական-ի հետ զրույցում մի շարք գյուղացիներ ներկայացրին իրենց դժգոհությունները՝ մթերման գործընթացի հետ կապված: Գյուղացիներն իրենց հերթին էին սպասում գործարար, ԲՀԿ նախկին առաջնորդ Գագիկ Ծառուկյանին պատկանող Մասիսի կոնյակի գործարանի և Պռոշյանի գինու և կոնյակի գործարանի մոտ: Շատերի բերքը կարկտահարված, վնասված է, ուստի հիմա քաշքշուկի մեջ են՝ գործարանից-գործարան:
Գյուղացիներն իրենց դժգոհությունները ներկայացրին նաև Արարատի մարզում մթերումների գործընթացին հետևող ՀՀ Գյուղատնտեսության փոխնախարար Սամվել Գալստյանին: Նրա կարծիքով՝ գյուղացիները մթերման հարցերում շտապում են, խաղողի մթերումը սովորաբար սկսվում է սեպտեմբերի 25-ից հետո: Փոխնախարարը հավաստիացրեց, որ հանրապետությունում արդեն մթերվել է 47 000 տոննա խաղող:
