Մեծ Բրիտանիայի բնակիչներն ավելի մեծ պատրաստակամությամբ պատմում են ինտիմ կյանքի մասին, քան իրենց եկամուտների։ Նման եզրակացության են եկել սեռական կյանքի թեմայով աշխարհում խոշորագույն անանուն հարցումներից մեկի հեղինակները՝ փոխանցում է The Independent-ը։
Լոնդոնի համալսարանական քոլեջի հետազոտողները հարցման են ենթարկել երկու սեռերի 15 հազար բրիտանացիների և պարզել, որ պատասխանողների մեծ մասը՝ 97 տոկոսը, պատրաստ է անծանոթին պատմել իր սեռական զուգընկերների, դավաճանության դեպքերի և վեներական հիվանդություններով վարակվելու մասին։ Նրանց համար փակ թեմա է մնում եկամուտների մասին հարցը։ Աշխատավարձի մասին հարցին պատասխանել է միայն հարցվածների 20 տոկոսը, իսկ ընդհանուր ընտանեկան եկամտի մասին՝ գրեթե ոչ ոք։
Գիտնականները պարզել են նաև, որ բրիտանացի կանայք միջինը կյանքում ունեցել են 4 սիրեկան՝ 2 անգամ ավելի, քան 1990-ականների կեսերին համանման հարցման մասնակիցները, սակայն ավելի քիչ, քան տղամարդիկ (6 զուգընկեր)։ Չնայած զուգընկերների թվի մեծացմանը՝ բրիտանացիները վերջին 20 տարում միջինը սկսել են ավելի քիչ զբաղվել սեքսով՝ ամսական 3 անգամ՝ 5-ի փոխարեն։
