Շվեդիայի Ռիկսդագի կողմից Հայոց ցեղասպանության ճանաչման, ինչպես նաև Հայաստան-Շվեդիա միջխորհրդարանական կապերի ամրապնդման և զարգացման գործում նշանակալի ավանդի համար Շվեդիայի Թագավորության Ռիկսդագի պատգամավորներ Անելի Էնոքսոնը եւ Ֆրեդրիկ Մալմը պարգևատրել են Հայաստանի Հանրապետության Ազգային ժողովի Պատվո մեդալով:
Ապրիլի 22-ին ՀՀ Ազգային ժողովում հանդիսավոր պայմաններում պարգեւները նրանց հանձնեց ԱԺ նախագահ Հովիկ Աբրահամյանը: Իր խոսքում խորհրդարանի ղեկավարն ասաց. «Հարգարժան տիկին Անելի Էնոքսոն եւ պարոն Ֆրեդրիկ Մալմ, ուրախ եմ ողջունել ձեզ Հայաստանի Հանրապետության Ազգային ժողովում: Դուք այն քաղաքական գործիչներն եք, ովքեր խիզախություն ունեցան ուղիղ նայելու ճշմարտության աչքերին եւ նշանակալի ավանդ ունենալ Շվեդիայի խորհրդարանի կողմից Հայոց ցեղասպանության ճանաչման գործում:
Ավելի քան մեկ տարի առաջ` 2010 թվականի մարտի 11-ին, Շվեդիայի խորհրդարանը ձեր մասնակցությամբ ու ջանքերով իր ներդրումը կատարելով պատմական ճշմարտության վերականգնմանն ուղղված եւ օրեցօր ավելի ծավալվող միջազգային գործընթացում` ընդունեց որոշում, որով 1915 թվականին Օսմանյան կայսրությունում տեղի ունեցած իրադարձությունները ճանաչեց որպես ցեղասպանություն:
Ես տեղյակ եմ, թե ինչ լարվածության եւ դիմակայության պայմաններում է ընդունվել այդ որոշումը: Եւ այս պարագայում առավել ծանրակշիռ է դառնում անձամբ ձեր եւ որոշումն ընդունելուն նպաստած ձեր գործընկերների ներդրումը ոչ միայն Հայոց ցեղասպանության ճանաչման, այլեւ ընդհանրապես ցեղասպանություն երեւույթը որպես հրեշավոր հանցագործություն կանխելու մեջ:
1915 թվականին Օսմանյան Թուրքիայում իրականացված Հայոց ցեղասպանությունը դեռեւս ամբողջական արդարացի դատապարտման չի արժանացել միջազգային հանրության կողմից, թեեւ աշխարհի շատ պետությունների խորհրդարաններ ու կառավարություններ, միջազգային կառույցներ ճանաչել են այն: Չափազանց կարեւոր է, որ հանցագործություն կատարածն ինքը կարողանա հրապարակայնորեն գիտակցել եւ ընդունել մեղքը, իրերը կոչել իրենց անուններով եւ փորձել ապաշխարած անդամագրվել քաղաքակիրթ Եվրոպայի ընտանիքին: Շվեդիայի խորհրդարանի ընդունած որոշման մեջ նշված հետեւյալ արտահայտությունը ճշգրիտ բնութագրում է իրավիճակը. «Թուրքիան չի կարող ժողովրդավարական պետություն համարվել, քանի դեռ այնտեղ ժխտվում է անցյալի իրական պատկերը»:
Ավարտելով խոսքը` ՀՀ ԱԺ նախագահ Հովիկ Աբրահամյանը ՀՀ Ազգային ժողովի, իր գործընկերների, ՀՀ ժողովրդի անունից շնորհակալություն հայտնեց Անելի Էնոքսոնին եւ Ֆրեդրիկ Մալմին 2010 թ. մարտի 11-ին Շվեդիայի խորհրդարանի կողմից 1915 թ. Օսմանյան կայսրությունում տեղի ունեցած իրադարձությունները որպես ցեղասպանություն ճանաչելու մասին որոշման ընդունման հարցում ունեցած ներդրման եւ մասնակցության համար:
Պարոն Աբրահամյանը իր բոլոր գործընկերների անունից եւս մեկ անգամ շնորհավորեց նրանց ԱԺ Պատվո մեդալի արժանանալու կապակցությամբ եւ ցանկացավ նորանոր հաջողություններ: «Դուք հայ ժողովրդի իրական բարեկամներն եք»- նշեց ՀՀ ԱԺ նախագահը:
Շվեդիայի Ռիկսդագի պատգամավոր Անելի Էնոքսոնը շնորհակալություն հայտնելով բարձր պարգեւի համար` մասնավորապես նշեց. «Երբ 2011 թ. մարտի 11-ին Շվեդիայի խորհրդարանում քվեարկեցինք ցեղասպանությունը ճանաչելու օգտին, մենք դա արեցինք, քանի որ դա բխում էր մեր հոգու խորքից»: Շվեդ պատգամավորի խոսքերով` որեւէ ազգ, որեւէ պետություն չի կարող հանգիստ մնալ, որ անցյալում տեղի ունեցածը մոռացության մատնվի: «Թուրքիան պետք է ներողություն խնդրի ձեր ժողովրդի նկատմամբ կատարված ցեղասպանության համար»,- հայտարարեց Անելի Էնոքսոնը` հայ ժողովրդին մաղթելով ամենայն բարիք. «Աստված թող օրհնի ձեզ»:
