ՀՀ նախագահի նախկին թեկնածու, ԱԻՄ առաջնորդ Պարույր Հայրիկյանի բուժումը արտերկրում կազմակերպելու համար այսօր ՀՀ կառավարությունը 20 միլիոն 500 հազար դրամ հատկացրեց: Այս գումարով, որը մոտ 52 հազար դոլար է կազմում, Հայրիկյանը պետք է արտասահմանյան կլինիկաներից մեկում` զրոյից հետազոտություն անցնի: Այս մասին Aravot.am-ի հետ զրույցում ասել է Ազգային ինքնորոշում միավորման ներկայացուցչական խորհրդի անդամ Մանյա Ղազարյանը, որից հետաքրքրվել էինք, թե այդ գումարով ինչպիսի՞ բուժման կուրս է անցնելու պարոն Հայրիկյանը:
«Գումարը առձեռն չեն տալու, պետք է փոխանցվի կլինիկա`համապատասխան բուժման դիմաց: Թե որքան կպահանջվի նրա բուժման համար, դեռ պարզ չէ, գումարի չափը կորոշվի բուժման ամբողջ կուրսից հետո»,-ասել է Ղազարյանը: Ներկայումս նախագահի նախկին թեկնածուն գտնվում է Հոլանդիայում և այնտեղի կլինիկաներից մեկում էլ անցնելու է հետազոտական և բուժման կուրսը:
Ղազարյանի փոխանցմամբ, Հայրիկյանի բուժումը Հայաստանում ոչ միայն դրական արդյունք չի տվել, այլև` դեռ մի բան էլ հետ է գնացել. «Երբ նրանց ուղարկել ենք մեր հետազոտության արդյունքները` նկարները, արտերկրի բժիշկները զարմացել էին, թե տեխնիկապես որքան հետ ենք: Այդ պատճառով էլ այդքան ժամանակ նա այստեղ ցավերից տառապում էր: Չէր ուզում գնալ, ուզում էր մնալ՝ մեր երկրում բուժվել, բայց վիճակը դեպի լավը չէր գնում»:
Հոլանդիայում Պարույր Հայրիկյանն, ըստ Մանյա Ղազարյանի, նյարդերի հետ կապված բարդ վիրահատության պետք է ենթարկվի. «Ըստ նախնական ախտորոշման, նյարդային թելիկները այդ հատվածում լուրջ վնասվել են և կպել են իրար, դրանք պետք է անջատվեն միմյանցից ու հեռացվեն»:
Պարույր Հայրիկյանը Հոլանդիա է մեկնել տիկնոջ հետ:
