Հայաստանի պետական ճարտարագիտական համալսարանի (Պոլիտեխնիկ) նախկին ռեկտոր Հովհաննես Թոքմաջյանը թեև վարչական աշխատանքի հրավերներ ստացել է, սակայն այս պահին նպատակահարմար չի գտնում ընդունել այդ առաջարկները։ Այս մասին «Առաջին լրատվականի» հետ զրույցում նշեց Հ. Թոքմաջյանը՝ հավելելով, որ նախընտրում է զբաղվել իր սիրելի գիտական աշխատանքով։
«Վարչական աշխատանքի տարիներին շատ գիտական գործեր կիսատ են մնացել։ Վարչական աշխատանքի չեմ սպասում, գիտական աշխատանքի եմ սպասում, մասնավորապես զարգացնելու եմ կապերը ՅՈՒՆԵՍԿՕ-ի հետ, իմ մասնագիտության՝ ջրային հիմնախնդիրների գծով։ Ես Հայաստանում ՅՈՒՆԵՍԿՕ-ի ներկայացուցչության ղեկավարն եմ։
Այլ աշխատանքի առաջարկներ եղել են, բայց ես նպատակահարմար չեմ գտնում այս պահին զբաղվել վարչական կամ բիզնես ծրագրերով»,- ասաց նախկին ռեկտորը։
Նա ընդգծեց, որ արդեն երկու ամիս է՝ գիտական աշխատանքներով է զբաղվում։ «Օրս չի հերիքում, բավական լարված գրաֆիկով եմ աշխատում»,- ասաց նա։
Անդրադառնալով հարցին, թե արդյոք Պոլիտեխնիկ համալսարանից աշխատանքի հրավեր եղել է և եթե եղել է, ապա ինչպես է արձագանքել, Թոքմաջյանը պատասխանեց. «Ամենասկզբում առաջարկվել է, և ես պատասխանել եմ, որ մեկ համալսարանում երկու ռեկտոր չի լինում, իսկ այլ աշխատանքի անցնելու որևէ հիմք չեմ տեսնում»։
Ինչ վերաբերում է Պոլիտեխնիկի նոր ռեկտորի աշխատանքին, Թոքմաջյանն արձագանքեց. «Ցուցանիշները կխոսեն իրենց մասին, և դա կլինի լավագույն գնահատականը։ Ես դուրս գալուց առաջ տպել եմ ցուցանիշները, որոնք եղել են այդ պահի դրությամբ։ Կանցնի մի քանի ամիս, կլինեն նոր ցուցանիշներ, որից պարզ կլինի, թե ինչ է կատարվում»։
Լուսանկարը՝ Armenpress-ի
