Իրանից այս տարի մեր երկիր զբոսաշրջիկների թիվը կտրուկ նվազել է: Այժմ նրանք նախընտրում են նույն գումարի դիմաց ավելի որակյալ ծառայություններ ստանալ Վրաստանում, Դուբայում և Իրաքի քրդական տարածքներում: «Առաջին լրատվական»-ի հետ զրույցում «Տաթև տուրի» տնօրեն Առլեն Դավուդյանն ասաց, որ իրանցիների ներհոսքը նվազել է նաև Իրանում առկա ֆինանսական խնդիրների պատճառով. «Անցյալ տարվա համեմատ, այս տարի պարսիկների 1/5-ն է եկել Հայաստան, և եթե հատուկ մի բան այստեղ չկազմակերպվի, օրինակ՝ համերգ, շոու… Տարվա այս եղանակին որևէ գրավչություն չկա, եղանակը ցուրտ է, կանաչ չկա»:
Մեր զրուցակիցն ասաց, որ իրանցիները հիմնականում երեք կամ չորս օրով են գալիս Հայաստան, առաջարկվող փաթեթի մեջ մտնում է հյուրանոցը, մի օր քաղաքում շրջագայելը, իսկ եթե ուզում են ավելի շատ շրջագայել, ապահովում են դեպի Գառնի, Գեղարդ կամ Սևան արշավով: Պարոն Դավուդյանը փոխանցեց նաև, որ տուր-փաթեթները չեն ապահովում 24-ժամյա տրանսպորտ, զբոսաշրջիկներն օգտվում են տաքսի ծառայություններից. «Պարսիկների՝ Հայաստան գալը օգուտ է տաքսու վարորդներից մինչև օդանավակայանի տնօրենին: Բայց, չգիտես ինչու, մենք մեզ նրանցից [պարսիկներից] վեր ենք դասում և հաճախ արհամարհանքով ենք վերաբերվում»:
