Երևանի ավագանու ընտրություններում «Ժառանգություն» կուսակցության միասնական «Բարև, Երևան» ցուցակի 10-րդ համարը ներկայացնող «Ես Yes» ժամանցային-երիտասարդական ամսագրի գլխավոր խմբագիր Անի Քոչարը Facebook-ի իր էջում գրել է.
«Այնքան մեծ ցավ եմ ապրում, երբ տեսնում եմ, որ ամեն բան թշնամանքի դիտանկյունից եք տեսնում, այն որ հարյուրավոր վիրավորված հաշմանդամություն ունեցող մարդկանց անունից ՀԿ-ն հանդես է եկել հրապարակմամբ, դա դեռ չի նշանակում, որ չի հարգվում դերասանը և կամ նրա հասցեին վիրավորական բաներ կան գրված: Դուք նման բան նկատեցի՞ք:
Ցավում եմ նաև, որ մեր հասարակության համար լալոշ, շաշ ու չոլախ բառերը միանգամայն նորմալ են որակվում: Այն, որ Ա. Էլբակյանը իր խոսքում գուցե չգիտակցված կամ անզգուշաբար, անկախ իր կամքից վիրավորել է հաշմանդամություն ունեցող մարդուն, դա միայն կզգա և կհասկանա այդ խնդրի կրողն ու նրա հարազատները, բայց այս բարեկիրթ արձագանքը, որտեղ դերասանի հասցեին և ոչ մի վիրավորական խոսք չկա այս կերպ է մեկնաբանվում կամ արդեն իսկ որոշ կայեր, հայտնի պատճառներով, սկսել են կրկին շահարկել իմ և Արմանի անունները, ես կարող եմ միայն նրանց մեկ բան ասել. Աստված է վկա` ով ինչ և ինչ նպատակով է անում, ամեն մարդ թող իր խղճի առջև պատասխան տա և եթե Արմանի այս արդարացի արձագանքի տակ ենթատեքստեր եք փնտրում, ես ցավում եմ ձեզ համար:Եվ մի լրացում, միայն մեր երկրում է արդարացի պայքարը կամ շահերի պաշտպանությունը այլ որակումներ կամ անվանումներ ստանում: Պայքարել չի նշանակում կռվել, չի նշանակում թշնամանալ, չի նշանակում պատերազմել, չի նշանակում չարանալ, չի նշանակում թույնով լցվել: Աստված իմ, երբ ենք հասկանալու, որ մարդ կարող է պայքարել հանուն մի բանի և չթշնամանալ: Պայքարող և ընդվզող մարդ ու տեսակ լինելով հանդերձ, երբեք հոգիս չեմ լցրել չարությամբ և չկա մեկը, ում մասին ասեմ, որ ատում եմ կամ թշնամիս է, իմ հոգում տեղ չկա չարության համար, մեկընդմիշտ ականջներիդ օղ արեք իմ տեսակից կաթված ստացող և ամեն կերպ անունս սևացնել փորձող էակներ: Աստված ձեզ հետ…
Պատը մնում է պատ, պակասում է մի լավ ճակատ»: