Ինչպես արդեն տեղեկացրել ենք, Շիրակի մարզում տեղի է ունեցել մասսայական թունավորման դեպք: Դեպքը գրանցվել է մարզի Ձիթհանքով գյուղում: Թունավորվել է նաև գյուղապետը:
«Առաջին լրատվական»-ի Գյումրու թղթակցի հետ զրույցում գյուղապետ Հովիկ Պողոսյանը նշեց, որ թունավորման ախտանշաններն ի հայտ են եկել անցյալ երկու օրերին: Որպես թունավորման հիմնական պատճառ գյուղապետը նշեց խմելու ջուրը կամ մրգեղենը: Ըստ Հ.Պողոսյանի՝ թունավորվել է 21 մարդ, որից 20-ի վիճակն այս պահին կայուն է և բավարար, նրանք բուժում ստանում են ամբուլատոր պայմաններում, իսկ մեկ մարդ` Գյումրու ինֆեկցիոն հիվանդանոցում:
Գյուղապետ Պողոսյանը նշեց, որ անհրաժեշտ ուսումնասիրությունների համար ջրից ու սննդից նմուշներ վերցվել են, և առաջիկա 24 ժամվա ընթացքում կլինեն անալիզների պատասխանները:
