ՀՀ առողջապահության նախարար Դերենիկ Դումանյանը Միացյալ հայկական հիմնադրամի նախագահ Հարութ Սասունյանի հետ հանդիպման ընթացքում քննարկել է առողջապահության ոլորտին վերաբերող մի շարք հարցեր։ Նախարարը չափազանց բարձր է գնահատել մեծ հայրենասերի հոգատար վերաբերմունքը ինչպես հայրենիքի, այնպես էլ առողջապահության ոլորտի հանդեպ և երկարամյա ներդրումը Հայաստանի բնակչությանն անվճար դեղերով և բժշկական պարագաներով ապահովելու գործում։
Դերենիկ Դումանյանն իր հյուրին է ներկայացրել նախորդ հանդիպումից հետո ոլորտում կատարված նորությունները։ Նշել է, որ արդեն կայացել է դեռևս երկրաշարժից հետո կուտակված ժամկետանց դեղերի և բուժպարագաների ոչնչացման համար մրցույթը և շատ շուտով կկատարվի դրանց վնասազերծումը։
Նախարարը նաև տեղեկացրել է, որ 2013թ. առաջին անգամ տարվա կարիքների համար մրցույթը հայտարարվել է վեց ամսվա կտրվածքով, ինչը հնարավորություն կտա ընթացքում ուսումնասիրել պահանջարկի տատանումները, ինչպես նաև հաշվի առնել հումանիտար ճանապարհով ստացվող դեղերի առկայությունը։ Եվ որպեսզի անվճար տրամադրվող դեղերի բաշխման ընդհատումներ չլինեն, մինչև ապրիլի կեսերը կկազմակերպվի երկրորդ կիսամյակի մրցույթը։ Դերենիկ Դումանյանը նաև հավելել է, որ կազմակերպված բավական մրցակցային, թափանցիկ մրցույթի արդյունքում տնտեսվել է մոտ 240 մլն դրամ։ Այդ և այլ մրցույթներից խնայված միջոցները կտրամադրվեն բնակչությանն անվճար տրամադրվող դեղերով ապահովվածությունը մեծացնելուն։
Այնուհետև Դերենիկ Դումանյանն ու Հարութ Սասունյանը քննարկել են հետագա համատեղ աշխատանքի ուղղություններն ու մեխանիզմերը։ Միացյալ հայկական հիմնադրամի նախագահը շեշտել է, որ վերջին շրջանում նախարարության հետ համագործակցությունը դյուրացել է և դարձել առավել նպատակային։
