«Ժառանգություն» կուսակցության առաջնորդ Րաֆֆի Հովհաննիսյանի հացադուլն ու պահանջները և՛ խորը ցավ են, և՛ ծաղր՝ մեր իրականության համար: Մի կողմից՝ լուրջ կարելի է մեկնաբանել, մյուս կողմից՝ ժողովրդի շրջանում անեկդոտներ են ստեղծվում: Քիչ առաջ լրագրողների հետ հանդիպման ժամանակ այս մասին ասաց ԱԺ Հանրապետական խմբակցության ղեկավար, Հանրապետական կուսակցության փոխնախագահ Գալուստ Սահակյանը՝ խոսելով ներքաղաքական զարգացումների մասին:
Նրա խոսքով՝ չէր ցանկանա, որ ժողովրդին այսօր-վաղը հուսահատության հասցնեին: Բանախոսի գնահատմամբ՝ դրականն այն է, որ ստեղծվում է նոր քաղաքական մշակույթ: Սակայն, նրա կարծիքով, ծաղր է այն, որ երկու ամիս է՝ ընտրություններից հետո հնչում է «ես նախագահ եմ» արտահայտությունը, սակայն դրան հաջորդում է՝ «ես նախարար եմ»:
«Ասում են, թե մեր թեկնածուները կլինեն քաղաքացիական հասարակությունից, իբր թե ես ու դուք քաղաքացիական հասարակությունից չենք: Նա չունի կադրային բանակ ու քաղաքական թիմ. ավագանու ցուցակում հայտնված մարդիկ իրենց անունները կարդում՝ զարմանում են. սա ծաղր է»,- նման տեսակետ հայտնեց Գալուստ Սահակյանը:
Անդրադառնալով Երևանի ավագանու ընտրություններին՝ Գալուստ Սահակյանն ասաց, որ բոլոր քաղաքական ուժերը հանկարծ սկսեցին սիրել Երևանը, իսկ Հանրապետականն ասում է՝ կարևորն այն է, որ երևանցիները սիրեն քաղաքական գործիչներին:
«Ընդդիմադիրներն առանց պատկերացնելու քաղաքն ու նրա օրգանիզմը՝ իրենց կուսակցական ճանապարհի տերիտորիա են պատկերացնում Երևանը: Խոսում են Երևանում վերելակների, աղբահանության խնդիրներից՝ այն դեպքում, երբ Հայաստանի խնդիրն է դա, իսկ Երևանը կենսակերպ է, կարճ ժամանակում չենք կարող երևանյան հոգեբանության դրսևորումներով ճանապարհ հարթել: Եթե ՏԻՄ-երի փորձ ձեռք բերած լինեին, կիմանային՝ ինչի մասին է խոսքը»,- նշեց Գալուստ Սահակյանը՝ կեղծ նոտաներ տեսնելով ընդդիմության գործելակերպում այս ընտրությունների վերաբերյալ:
Հանրապետական խմբակցության ղեկավարի կարծիքով՝ ՀՀ-ում ընդդիմադիր դաշտ չի ձևավորվի, եթե իշխանություն դառնան ընդդիմադիրները, նրանց պորտֆելներ տրվեն, իսկ եթե պորտֆելներ են ուզում, թող ասեն, որ ուզում են մարզպետ, քաղաքապետ դառնալ և այլն:
«Մենք կողմնակից ենք, ես տրամադրված եմ համագործակցությունների, որովհետև մենք մեր իրականության մեջ թշնամիներ չպետք է որոնենք, մենք բոլորս պայքարում ենք հզոր Հայաստանի համար: Դրա համար քաղաքական դաշտը պետք է շատ ակտիվ, երբեմն շատ անհանգիստ լինի, իսկ դժբախտ չի կարող լինել, ինչը մենք տեսնում ենք այս օրերին»,- ասաց Գալուստ Սահակյանը:
Հարցին՝ Րաֆֆի Հովհաննիսյանը կգնա՞ երկխոսության, պատասխանեց, որ իրենց՝ իշխանության մոտեցումը հետևյալն է. ուզում են, որ ժողովրդի համար հասկանալի դառնա, թե լուծումները որտեղ պետք է փնտրել:
«Եթե նույնիսկ չգնա, մենք արդեն աշխատում ենք, մենք անում ենք այն ծրագրերը, որոնց վերաբերյալ խոստումներ ենք տվել: Մենք ուզում ենք ընդդիմություն, որի արդյունքները տեսանելի կլինեն»,- եզրափակեց իր խոսքը Գալուստ Սահակյանը: