Իշխող Հանրապետական կուսակցությունը թեպետ Երևանի ավագանու ընտրություններին ընդառաջ էլ նույն երգն է երգում, թե մասնակից մյուս ուժերի պայքարը երկրորդ տեղի համար պետք է լինի, սակայն իրականում բավականին խուճապային տրամադրություններ են տիրում ՀՀԿ-ում, և ամեն ինչ անում են առավելագույն ձայներ ապահովելու համար: Այս անգամ որոշել են «ազատ և արդար» ընտրությունների հետևից այնքան էլ չընկնել, այլ ամեն ինչ անել 50 տոկոսից ավելի ձայներ հավաքելու համար, որպեսզի խուսափեն հետընտրական անկանխատեսելի զարգացումներից, մասնավորապես ընդդիմադիր ուժերի միավորումից: Առավել ևս, որ մտահոգություններն օբյեկտիվ հիմքեր ունեն՝ դրան գումարած այն, որ, որոշ տեղեկություններով, ՀՀԿ-ն ներքին սոցհարցում է արել և պարզել, որ իրենց կուսակցության վարկանիշը տոկոսային ցուցանիշով զիջում է թե՛ ԲՀԿ-ին, թե՛ «Ժառանգությանը»: Նրանցից հետ չի մնում նաև ԲՀԿ-ն: Արդեն ձայն գնելու աճուրդային սակարկություններ են գնում: ԲՀԿ-ն նաև հայտարարում է, որ տեր է կանգնելու բոլոր ընդդիմադիր ուժերի ձայներին, որպեսզի հետընտրական դաշինք կազմեն ՀՀԿ-ի դեմ: Ի՞նչ մթնոլորտ է երկու մարտնչող ճամբարներում, «Հրապարակ»-ը զրուցեց ՀՀԿ և ԲՀԿ ներկայացուցիչների հետ:
ՀՀԿ փոխնախագահ Գալուստ Սահակյանից թերթը հետաքրքրվեց, թե սոցիոլոգիական հարցումը, որը, թերթի տեղեկություններով, ցույց է տվել, որ ՀՀԿ-ն ավագանու ընտրությունների շեմին 9 տոկոսի քվե ունի, ինչպե՞ս է անդրադարձել իրենց աշխատանքի վրա: «Հավանաբար, մի 0-ն չեք ասում, մեր թեկնածուն ոչ թե 9, այլ 90 տոկոս վարկանիշ ունի»,- ասաց Գրիգորիչը:
– Քաղաքական ուժերը սկզբում հաղթում են այնքան, բայց վերջում սկսում են մտորել, որ հանկարծ չստացվի կոալիցիա կկազմենք և դրանով կուժեղանանք: Սոցիոլոգիան դա է, բոլորը, անկախ իրենցից, մի թիվ են ասում: Նորից նույն պատմությունն է. փոխարեն ժողովրդի մեջ մտնեն հասկացնեն՝ իրենք ով են, մտածում են՝ պայքարենք ՀՀԿ-ի հետ, որի հետևանքը լինում է այն, որ ՀՀԿ-ն նորից ու նորից բարձր արդյունքներ է ցուցաբերում:
– Նախագահի ընտրություններին էլ պարծեցաք, որ առաջին տեղն անվերապահորեն ձերն է, պայքարը երկրորդի համար է լինելու, բայց տեսա՞ք՝ տհաճ անակնկալները մեծ էին:
– Քանի Հայաստանում տհաճ թիմեր կամ տհաճ մարդիկ կան, միշտ էլ կարող են տհաճ անակնկալներ լինել: Բայց ՀՀԿ-ն իր արդյունքները դրական է գնահատում, անկախ նրանից, թե որ թիմը ինչպիսի պրոցեսների մեջ իրեն կնետի:
– Մեծ քաղաքներում Սերժ Սարգսյանը պարտվեց, դա՞ էր դրական:
– Հայաստանը մեկ Հայաստան է, մենք որևէ տեղ չենք պարտվել, մենք ռեալ ձայներ ենք հավաքել, որի շեշտադրումները մեզանում և ընդհանուր տարբեր գնահատականներում ամփոփված խնդիր է, խնդիրն արդեն փակված է: Այն թիվը, որը մենք ենք ստացել մեր նման երկրներում, որտեղ պրոբլեմներ կան, կարելի է նաև հաղթանակի նման որակում տալ, որովհետև ժողովուրդը շատ լավ հասկանում է, որ դա երկրի անվտանգությունն է և դրա հետ կապված մյուս բոլոր խնդիրները:
– Այս ընտրապայքարը կարծես ավելի շատ գնալու է թաղային հեղինակությունների հարթությունում, նրանք բավական ակտիվացել են, խոսվում է նաև, որ մի ձայնի դիմաց կուսակցությունները պատրաստ են 50-100 հազար դրամ տալ:
– Այս ընտրությունների հիմնական գաղափարը նա է, որ ովքեր չեն մասնակցել ընտրություններին կամ մասնակցել ձախողել են, պիտի որոշակիորեն իրենց տրամաչափի դրոշներ ստեղծեն, որպեսզի հետո քաղաքական հենարան ունենան: Եթե էդ ծավալներով նաև գողերին են իրենց մեջ տեսնում, դա էլ խնդիր է:
– ՀՀԿ–ն հույսը գումարի՞, թե՞ հեղինակությունների վրա է դրել:
– Եթե գումարով խնդիրը լիներ, ուրեմն Դուք հիմա լրագրող չէիք աշխատի: Գումարը ոչինչ չի որոշում: Եվ գումարներ չկան, պարզապես մենք չենք ուզում նաև տեղերը ցույց տանք ցաքուցրիվ, թե որտեղ ինչ կա. գումարային հոսքեր ծռեցին, և ինչով է կատարվում այսօրվա միտինգային երևույթները և ինչի հաշվին… Որովհետև պարզապես դա մեր թեման չէ: Մենք ուրիշների գրպանները չենք մտնում: Եթե ես տեղեկատվություն չունեմ, որ Րաֆֆի Հովհաննիսյանը կամ ԲՀԿ-ն փողաբաժաններ են, դա հիմնականում ժողովրդի աչքին թոզ փչելու հնարավորություն է կրկին: Փողով ո՛չ լրագրողն է աշխատում, ո՛չ ոչլրագրողը, ո՛չ գյուղացին, ո՛չ դարբինը, ո՛չ էլ հունձ անողը: Էնպես որ, դրանք արդեն հնացած թեմաներ են, վաղուց արդեն քաղաքական դաշտից վերացած: Մենք ունենք մեր քաղաքական ճակատագիրը, մեր փորձառությունը և մեր աշխատանքը, որի վրա էլ ոչ թե հույս ենք դրել, կարծում եմ՝ դա հույսի խնդիր չէ, որի հետևանքով մենք նորից կփորձենք առաջընթացներ ապահովել Երևանում:
– Լուրերը, որոնք ստանում ենք, ցույց են տալիս, որ ՀՀԿ–ում, այնուամենայնիվ, վախեր կան այս ընտրությունների մասով: Անգամ մարզպետներից ոմանք խոստովանեցին, որ աշխատելու են Տարոն Մարգարյանի և ՀՀԿ–ի հաղթանակի օգտին:
– Ես չէի ուզի Ձեզ էլ դիտարկեի այն մարդկանց շարքում, որոնք լուր են ստեղծում և դառնում լուրի գերին: Իսկ մարզպետն անձ է և քաղաքական վիճակներ շարադրելու և գնահատելու այդքան մեծ ծավալներ չի կարող ապահովել: Մենք գիտենք, թե մենք ինչ ունենք, ընդ որում մեր ուժի մի մասնիկն էլ մարզպետներն են, էնպես որ չեմ կարծում, որ կարելի է նորից սենտիմենտանքներով քաղաքի կենսակերպը փոխել և դա դարձնել այլ տիպի ընտրություններ, որտեղ քաղաքական թիմերը ոչ թե քաղաքի ցավով ու դարդով են ապրում, այլ ընդամենը իրենց քաղաքական իմիջն են ապահովում: Եթե դա այդպես չլիներ, 2000-ական թվականներից քաղաքական որևէ թիմ Երևանի հարցով ոչ դիմել է, ոչ մեկնարկել է, ոչ մոտեցում է ցուցաբերել, էսօր նոր խնդիր է առաջացել, և սկսել են շատ սիրել Երևանը: Իհարկե, դա էլ եմ դրական համարում, տա աստված, որ Երևանն էլ իրենց սիրի:
Տիգրան Ուրիխանյան, ԲՀԿ մամլո խոսնակ
– Ոչ մի օրինավոր թանաքով գրիչ, ոչ մի ծրարի մեջ գցած բան, ոչ մի տեսախցիկ, ոչ մի իբր այլ հնարամտություն չի կարող ստուգել, թե ով ում օգտին է նշան դրել վանդակի մեջ քվեաթերթիկում: Հետևաբար, յուրաքանչյուր երևանցի, ինչպես էլ իրենց մոտենան, ինչ առաջարկ էլ անեն, թող ցանկացած դեպքում իրենց ընտրությունը կատարեն իրենց ցանկության շրջանակներում: Թող իմանան, որ ոչ մի կերպ չի ազդելու կաշառքը ընտրությունների արդյունքների վրա, մանավանդ, որ ընտրությունները լրջագույնս հսկվելու են և ԲՀԿ-ի, և շահագրգիռ այլ կուսակցությունների մարդկային ռեսուրսի կողմից:
– Բայց հենց ԲՀԿ–ին են մեղադրում ընտրակաշառք բաժանելու մեջ:
– Ես չեմ պատրաստվում նման մյունհաուզենական արտահայտություններ մեկնաբանել: Կաշառք թող բաժանեն նրանք, ովքեր գնում են ոչ թե աշխատելու, այլ ժողովրդի փողերն ուտելու:
– Հիմա պիտի ասեք, որ խորհրդարանական ընտրություններին է՞լ եք զերծ մնացել ընտրակաշառքից, տեսանք, լսեցինք, չէ՞, ինչ եղավ:
– Տեսաք ու չդիմեցի՞ք ոստիկանություն: Առավոտից իրիկուն ասում էին՝ մեկդ մի դիմում գրեք: …Իսկ դուք լսե՞լ եք, որ կետերը օվկիանոսում պակասում են, ինչո՞ւ միջոցներ չեք ձեռնարկում: Մի խոսքով, կաշառքային թեմաներն ինձ համար չեն: Ես հեռու եմ կաշառքային թեմաներից գենետիկորեն:
– Ձեր անունից եք խոսում, իսկ ձեր կուսակցությո՞ւնը՝ ԲՀԿ–ն:
– ԲՀԿ-ն հոգեվիճակ է, ԲՀԿ-ն լուսավոր գաղափար է, ԲՀԿ-ն հույս է դեռևս երկիրը չլքած փոքրաթիվ քաղաքացիների համար: ԲՀԿ-ն սկիզբն է ու վերջը…
– Էլի ոտանավոր գիտե՞ք ԲՀԿ–ի մասին:
– Դա ոտանավոր չի, այլ Աստվածաշնչից…
– Ընտրակաշառքի մասին ակնարկեցիք, դրանից բացի, Ձեր կարծիքով, այս ընտրություններին ՀՀԿ–ն ընտրական ի՞նչ հնարքների է դիմելու, և դրանց դեմն ինչպե՞ս եք պատրաստվում առնել:
– Ցանկացած դեպքում ընտրությունների վերահսկման մեխանիզմը հետևյալն է, եթե, իհարկե, պատասխանատուները, պատկան մարմինները, պետական կառույցները չեն կատարում իրենց աշխատանքը հավուր պատշաճի, ուրեմն մնում է միակ տարբերակը՝ ահռելի մարդկային ռեսուրսը զբաղվում է կազմակերպչական աշխատանքով, զտում է ցուցակները, ստուգում է՝ որտեղ բազմաբնակարան շենքերի բնակարաններում կամ տներում ապրում են մարդիկ, գրանցվա՞ծ են, թե՞ ոչ, որտե՞ղ չեն ապրում մարդիկ, որոնց բացակայությունից օգտվելով՝ շատերը կազմակերպում են կրկնաքվեարկություն: Նախապատրաստելով ալտերնատիվ ցուցակներ և այդ ցուցակները հրապարակելով ու նաև պարտադրելով, որ հանձնաժողովների պատրաստածները համապատասխանեն իրականությանը: Դրանից հետո տեղամասում աշխատանք և հաշվարկի ժամանակ աշխատանք: Այս աշխատանքը պիտի կատարվի, որ իրենք չկարողանան կեղծ ցուցակներ պատրաստել և չկարողանան կեղծել ընտրությունները:
– Իսկ ի՞նչ խախտումներ եք արդեն առանձնացրել ՀՀԿ–ի կողմից:
– Երևանի քաղաքապետարանի եթերաժամը, որն «Արմնյուզ» ՀԸ-ով տրամադրված է Երևանի քաղաքապետարանի գործունեությունը լուսաբանելուն, ի՞նչ իրավունքով է զբաղվում Տարոն Մարգարյանի քարոզով: Ի՞նչ իրավունքով են ցույց տալիս կադրեր, երբ Տարոնը գնում է ինչ-որ տեղ, և այնտեղի մարդիկ ասում են՝ վայ, էս ինչ լավն եք Դուք: Սա խախտում է, քանի որ ոչ միայն քարոզարշավը չի սկսվել, այլև համոզված եմ, որ դա արվում է պետական միջոցներով: