Սիրիայի նախագահ Բաշար Ալ-Ասադի հավատակիցները՝ ալաուիական ուղղության մի քանի տասնյակ ներկայացուցիչներ, կիրակի հանդիպում են ունեցել Կահիրեում՝ Սիրիայում գտնվող ալաուիներին կոչ անելով միանալ ընդդիմությանը, քանի դեռ շատ ուշ չէ: Այս մասին հայտնում է Fox News-ը:
Ալաուիները երկար ժամանակ դիտարկվում էին որպես Ասադի վարչակարգի ողնաշարը, և սիրիական ընդդիմությանն աջացելու մասին այս որոշումը բարդացնում է իրավիճակը, քանի որ ալաուիներից շատերն իրենց ապագան դեռ տեսնում են Ասադի վարչակարգի գոյատևման մեջ:
Նրանք, ովքեր համարձակվում են հակառակվել Ասադին, ճնշումների են ենթարկվում ոչ միայն վաչակարգի, այլևս սեփական ընտանիքների կողմից: Ընդդիմադիր կոնֆերանսի գրեթե բոլոր՝ 50 ալաուի մասնակիցները ձերբակալված են եղել, բռնության կամ սպառնալիքների ենթարկվել իրենց քաղաքական հայացքների համար: Մասնակիցներից մեկը նշել է, որ ինքը սպանության սպառնալիքներով նամակ է ստացել, որում պահանջվել է չմասնակցել կոնֆերանսին:
Սիրիացի ալաուիների համար իր տեսակի մեջ առաջին ընդդիմադիր հանդիպումը արտացոլում է նրանց վախն առ այն, որ Ասադի վարչակարգի տապալումից հետո իրենք կարող են դառնալ վրեժխնդրության զոհ: Ոմանք, մասնավորապես, մտավախություններ ունեն՝ կապված այլ երկրներից ջիհադիստների հոսքի հետ, որոնք շիաներին դիտում են որպես հերետիկոսներ: Շատ ալաուիներ կարծում են, որ սիրիական պատերազմը գոյության կռիվ է՝ ընդդեմ սուննի մեծամասնության:
Այսպես, ալաուիական ընդդիմադիր խմբի հայտարարությունում ասվում է, որ «սիրիական վարչակարգը այլ բնորոշում չունի, քան բռնակալությունն է»:
«Սիրիայի վարչակարգի այն հայտարարությունները, որ իրենք պաշտպանում են փոքրամասնություններին, մասնավորապես ալաուիներին… փորձ է աշխարհին ներկայացնել, որ սա պայքար է իսլամական ծայրահեղականության և ահաբեկչության դեմ»:
Հանդիպման մասնակիցներից մեկը նշել է, որ թեև շատ սիրիացիներ այլևս չեն վախենում բարձրաձայնել իրենց կարծիքը, սակայն ալաուիները ուժեղ ճնշման տակ են հենց իրենց համայնքի անդամների կողմից:
Մասնակիցներից մեկը կոնֆերանսը նկարագրել է որպես իրական ընդդիմադիր շարժում, որը չի ցանկանում առանձնանալ հայրենիքից: Նա դեմ է արտահայտվել Սիրիայն ըստ կրոնական ուղղությունների բաժանելուն կամ ալաուիական անկլավի առանձնացմանը (ինչպես եղավ 1930-ականների վերջին՝ Ֆրանսիայի մանդատի տակ):
«Ի վերջո, մենք բոլորս միևնույն նավում ենք, որը խորտակվում է: Մենք թիմի մի մասն ենք, որը փորձում է փրկել նավը»,- փաստել են հանդիպմասն մասնակիցները:
Ուշագրավ է, որ մասնակիցների մի մասը չեն հայտնել իրենց անունը կամ ներկայացել են կեղծանվամբ:
Ալաուիականությունը շիա իսլամի ուղղություն է: Այս ուղղության ներկայացուցիչները կազմում են Սիրիայի բնակչության 12 տոկոսը և հիմնականում բնակվում են Միջերկրական ծովի ափամերձ լեռնային շրջաններում: Սիրիայի հակամարտության այս երկու տարիների ընթացքում ալաուիները կամ չեզոքություն են պահպանել, կամ ապավինել են վարչակարգին:
