«Ժառանգություն» կուսակցության առաջնորդ Րաֆֆի Հովհաննիսյանն ուզում է «չպարտվող»-ի կերպարով ներկայանալ: «Առաջին լրատվական»-ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով Ազատության հրապարակում Րաֆֆի Հովհաննիսյանի ՀՀ գործող նախագահ Սերժ Սարգսյանին ուղղված առաջարկներին:
Ըստ Արմեն Բադալյանի՝ փետրվարի 18-ից հետո թվում էր, թե Ազատության հրապարակում Րաֆֆի Հովհաննիսյանն անորոշ ինչ-որ հայտարարություններ է անում, երբ ասում է, որ Ազատության հրապարակում «Ժառանգության» պայքարը չէ, որ կուսակցական դրոշներն իջեցվել են: «Քանի որ սա ժողովրդի պայքարն է, և բոլոր նրանք, ովքեր միշտ արտահայտվում են, որ ժողովրդի կողքին են, ժամանակն է, որ կանգնեն ժողովրդի կողքին, իսկ գաղտնիք չէ, որ կուսակցություններից ԲՀԿ-ի ղեկավարն է, որ գրեթե միշտ ասում է, թե ժողովրդի կողքին են: Րաֆֆիի նպատակը փետրվարի 18-ին կայացած նախագահական ընտրություններից հետո այն էր, որ Ազատության հրապարակ բերեր ԲՀԿ-ին, ՀԱԿ-ին, ՀՅԴ-ին: Եթե նրանք գային հրապարակ, դա բերելու էր այդ ուժերի պարտությանը, որովհետև հետընտրական գործընթացը վերջնակետ չունի:
Րաֆֆի Հովհաննիսյանը նախագահական ընտրություններից հետո գնում էր մարզեր և պահանջում էր մարզպետների հրաժարականները: Րաֆֆի Հովհաննիսյանին սա էլ չհաջողվեց, որովհետև տրամաբանական չէ, որ նա գնում է Գյումրի, մարդիկ բղավում են՝ «Սերժիկ, հեռացիր», իսկ նա ասում է՝ նման բաներ մի գոռացեք:
Ստացվում է, որ առաջին խնդիրը չկատարեց՝ կուսակցություններին Ազատության հրապարակ բերել, երկրորդը ևս չկարողացավ կատարել, այսինքն՝ հասնել միջին օղակի հանրապետական գործիչների հրաժարականին»,- մեկնաբանեց Արմեն Բադալյանը՝ շարունակելով, որ երեկ նրա առաջարկները ապացուցեցին ավելի վաղ հայտնած այն մտայնությունը, թե փետրվարի 18-ին կայացած նախագահական ընտրությունների կեղծված լինելու դեմ պայքարը հետաձգվեց շատ սահուն կերպով, սահուն կերպով իր լսարանը պահում է մինչև ապրիլի 5-ը, որից հետո սկսվում է Երևանի ավագանու ընտրությունների պաշտոնական քարոզարշավի շրջանը:
Նրա համոզմամբ՝ երեկ Րաֆֆի Հովհաննիսյանի ելույթից հետո կամաց-կամաց փետրվարի 18-ի կեղծված ընտրությունների դեմ պայքարը՝ արտահերթ նախագահական ընտրությունների անվան տակ, անորոշ ժամանակով հետաձգվում է:
«Հիմա նպատակը ընդամենը Ազատության հրապարակում լինելն է և Ազատության հրապարակում ընտրազանգված պահպանելը, որի համար տարբեր քայլեր են իրականացվում, ամեն հանրահավաք հռչակվում է հանգրվանային, հաղթական: Նա շատ լավ հասկանում է, որ ապրիլի 9-ին ՀՀ գործող նախագահն իրականացնելու է պետական երդմնակալությունը և լինելու է դե յուրե նախագահ, իսկ երբ ասում է, որ թույլ կտա դե ֆակտո ղեկավարել, ասում է նրա համար, որ ինքն ավագանու ընտրություններին գնա որպես դե յուրե նախագահ՝ հստակ կարգավիճակով, ինքը ցանկանում է իր ձայները կապիտալիզացնել Երևանի ավագանու ընտրությունների ժամանակ»,- ասաց Արմեն Բադալյանը՝ համոզմունք հայտնելով, որ անմիջապես ավագանու ընտրություններից հետո այս շարժումը մարելու է:
