Բոլիվիայի նախագահ Էվո Մորալեսը շաբաթ օրը հայտարարել է, որ իր երկիրը մոտ օրերին Չիլիի դեմ Հաագայի միջազգային դատարան հայց կներկայացնի: Խնդիրը կապված է տարածքային վաղեմի կոնֆլիկտի հետ, որը Բոլիվիային զրկում է օվկիանոս դուրս գալու հնարավորությունից:
«Ես որոշել եմ, որ մոտ օրերս մեր հանձնաժողովը Հաագա կմեկնի, որպեսզի մեր ինքնավարությունը (ծով դուրս գալու) վերադարձնելու վերաբերյալ հայց ներկայացնի»,- Մորալեսի խոսքերն են մեջբերում լատինամերիկյան ԶԼՄ-ները։
Խոսքը Հարավային Ամերիկայի այս երկու երկրների միջև վաղեմի կոնֆլիկտի մասին է, որը դեռ 19-րդ դարում է ծագել, երբ Չիլին Բոլիվիայի դեմ ռազմական գործողություններ է սկսել: Բոլիվիան այդ ժամանակ դեպի օվկիանոս ելք է ունեցել:
Կոնֆլիկտի պատճառ է հանդիսացել սելիտրայի հանքավայրերի նկատմամբ վերահսկողության հարցը: Պատերազմում հաղթել է Չիլին, իսկ Բոլիվիան կորցրել է ելքը դեպի օվկիանոս:
1904 թ. Խաղաղության պայմանագիր կնքելուց հետո պաշտոնական Լա Պասը չի կորցնում նախապատերազմական սահմանները վերականգնելու հույսը: Մորալեսը նախկինում էլ էր խոստացել Հաագայի դատարան դիմել, սակայն կոնկրետ գործողությունների գործը չէր հասել:
