Քրդական Fırat լրատվական գործակալության փոխանցմամբ, Թուրքիայում շարունակվում են քրդերի զանգվածային բողոքի ցույցերը, որոնք պայմանավորված են Թուրքիայի Բարձրագույն ընտրական խորհրդի (YSK) ընդունած որոշմամբ:
Ըստ դրա՝ քրդական «Խաղաղություն և ժողովրդավարություն» կուսակցության (ԽԺԿ) 7 ներկայացուցիչների արգելվել է հունիսի 12-ին կայանալիք խորհրդարանական ընտրություններում հանդես գալ որպես անկախ թեկնածուներ:
Թուրքիայի հարավարևելյան Հաքքարի նահանգում երեկ տեղի ունեցած բողոքի ցույցի ժամանակ ձերբակալվել է միանգամից 52 մարդ: 3 ցուցարարներ գազային ռումբերի պատճառով տարբեր աստիճանի մարմնական վնասվածքներ են ստացել և տեղափոխվել Հաքքարիի պետական հիվանդանոց:
Յուքսեքովայի շրջանում միանգամից 80 դպրոց բոյկոտել են դասընթացները և բողոքի ցույց սկսել: Այստեղ վիրավորվել է 8 և ձերբակալվել 1 ցուցարար:
Ադանայում էլ ձերբակալվել է 6 մարդ: Ընդհանուր առմամբ, Հաքքարիում, Յուքսեքովայում և Ադանայում տեղի ունեցած բողոքի ցույցերի ժամանակ ձերբակալվել է 59 և վիրավորվել 11 ցուցարար:
Հիշեցնենք, որ երեկ էլ նույն աղբյուրը հայտնեց, թե Թուրքիայի տարբեր շրջաններում գրանցված բախումների արդյունքում վիրավորվածների թիվն անցել է 50-ից, որից 9-ը`ոստիկան, իսկ ձերբակալված ցուցարարների թիվը հասել էր 234-ի: Ձերբակալվածների մեջ կան նաև 80 կին և երեխաներ:
