Ապրիլի 19-ին Եվրոպայի Հայկական Միությունների Ֆորումի և Սլովակիայի Հայ Համայնքի նախագահ Աշոտ Գրիգորյանի կողմից կազմակերպված էկումենիկ պատարագին և Հայոց ցեղասպանությունը խորհրդավորող խաչքարին ծաղկեպսակի մատուցման արարողությանը մասնակցեցին Սլովակիայի Ազգային Խորհրդի /ԱԽ/ փոխնախագահ Պավոլ Հրուշովսկին և մի շարք պատգամավորներ, Սլովակիայի առաջին վարչապետ Յան Չառնոգուրսկին, ԱԽ առաջին նախագահ Ֆրանտիշեկ Միկլոշկոն, մի շարք երկրների դեսպաններ, քաղաքական և հասարակական գործիչներ, լրագրողներ:
Սլովակիայի հեռուստատեսությանը տրված կարճ հարցազրույցի ընթացքում ԱԽ փոխնախագահ Պավոլ Հրուշովսկին հայտարարեց, որ ինքն երջանիկ է, որ Սլովակիան իր ԱԽ նախագահության օրոք` 2004թ-ին, ընդունեց Հայոց ցեղասպանության բանաձևը և օրինակ ծառայեց ԵՄ մի շարք երկրների` համանման բանաձևեր ընդունելու հարցում: Ըստ նրա հայ ժողովրդի միացյալ պայքարը Հայոց ցեղասպանության ճանաչման հարցում պետք է օրինակ ծառայի սլովակ ժողովրդին և աշխարհի շատ ժողովուրդների` որպես հանուն արդարության ու հանուն մարդկության համար կարևոր իդեաների պայքարելու փաստ:
Միջոցառմանն իրենց ելույթներում պարոն Միկլոշկոն և Չառնոգուրսկին նշեցին, որ Սլովակիան պետք է կանգնած լինի հայ ժողովրդի կողքին նաև Արցախի համար պայքարելու հարցում, քանզի հայ ժողովրդի գլխին փորձությունները դեռևս շարունակվում են ու դրանք փորձություններ են ողջ քրիստոնեա աշխարհի համար:
Միջոցառման կազմակերպիչ պարոն Աշոտ Գրիգորյանն իր խորին շնորհակալությունը հայտնեց Սլովակիայի իշխանություններին, միջոցառման բոլոր մասնակիցներին և հատկապես էկումենիկ պատարագի կազմակերպիչներին ` հայր Բարսեղ Պիլավչյանի ղեկավարությամբ ու հայտնեց, որ պայքարը ցեղասպանության ճանաչման գործում շարունակվելու է մինչև Թուրքիայի կողմից Հայոց ցեղասպանության ճանաչելու պահը:
21.04.11թ.
