Երեկ տեղի է ունեցել Երևանի թիվ 27 հիմնական դպրոցի տնօրենի թափուր պաշտոնի համար մրցույթը: Չորս թեկնածուներից մեկը՝ դպրոցի նախկին տնօրեն Սուսաննա Սարգսյանը, որը դատապարտվել էր պետությանը խոշոր չափերի գույքային վնաս պատճառելու համար: Արդյունքում միաձայն ընտրվեց նախկին տնօրեն Սուսաննա Սարգսյանը։ Երևանի ավագանու՝ «Բարև Երևան» խմբակցության անդամ, Կրթության ազգային ինստիտուտի փոխտնօրեն Անահիտ Բախշյանին, ով ներկա էր ընտրությանը, վրդովեց տեղի ունեցածից։ Լրագրողների հետ զրույցում նա ցույց տվեց Շենգավիթի դատախազի միջնորդագիրը ՝ուղղված քաղաքապետին, որտեղ նշված է, թե ինչպես է այդ տնօրենը կատարել յուրացման ու վատնման եղանակով հափշտակություններ, որով վնաս է պատճառել պետությանը։
«5 դրվագ կա, որտեղ գնացել, ուրիշի քարտով գումարն ստացել է…»: Անահիտ Բախշյանին չթողեցին ավարտել խոսքը, ուսուցիչները բղավում էին և շարունակում շնորհավորել տնօրենին։
Ավելի ուշ Անահիտ Բախշյանը հանդես եկավ հայտարարությամբ. «Ավարտվեց թիվ 27 դպրոցի տնօրենի ընտրության ոդիսականը, և կառավարման խորհրդի ներկա 8 անդամներ միաձայն վերահաստատեցին կոռուպցիան դպրոցում ՝ ի դեմս պետությանը խոշոր չափերի վնաս պատճառած, նախկին դատապարտված տնօրեն Սուսաննա Սարգսյանի:
Դպրոցի կառավարման խորհրդի անդամներից սկսած մինչև գործող նախագահը հաստատեցին կոռուպցիային հավատարիմ լինելու իրենց կամքը, հետևապես սին ու փուչ են իշխանությունների բոլոր այն խոսքերը, որոնք իրենք արտաբերում են այդ խայտառակ, պետությունն ու հասարակությունը ժանգի նման փչացնող երևույթի դեմ պայքարելու մասին:
Դպրոցում ներկա որոշ ուսուցիչներ ծափահարություններով ընդունեցին այս փաստը՝ ցուցադրելով իրենց համաձայնությունը կոռուպցիային և մատնելով իրենց մասնակցությունը այս անպատվաբեր երևույթին: Սա ընդամենը մեկ դպրոցում կատարվածն է, բազմապատկեք պետական բոլոր կառույցների նմանօրինակ ղեկավարների թվով և պատկերացրեք, թե ինչպես է վատնվում պետական բյուջեն:
Սա մեր իրականությունն է, այսօրվա հասարակության ու իշխանությունների դեմքն է, որից հրով լինի, սրով լինի, պետք է ազատվենք: Ձեռքերը ծալել, հուսահատվել՝ չկա»:
ՀՀ ԿԳ նախարարությունից «Առաջին լրատվական»-ին տեղեկացրին, որ դպրոցը քաղաքապետարանի վերահսկողության տակ է, և ճիշտ կլինի պարզաբանումներ ստանալ քաղաքապետարանից։ Ինչ վերաբերում է գործընթացի իրավաչափությանը, գրավոր բողոքին, որը կվիճարկեր ընտրության արդյունքը, նախարարությունը չի ստացել։ Ունեցած տեղեկատվությամբ՝ ընտրությունն անցել է գործող օրենքներին համապատասխան։
Երևանի քաղաքապետարանի կրթության վարչության պետ Գայանե Սողոմոնյանը մեզ հետ զրույցում ասաց, որ մրցույթը կազմակերպվել է օրենքով սահմանված կարգով։ Խորհուրդն ընտրել է նրան, ում նպատակահարմար է գտել։ Դպրոցի երեք ներկայացուցիչներ դիմել են՝ լեզվի-գրականության, պատմության և մաթեմատիկայի մասնագետներ։ Խորհրդի բոլոր 8 անդամները օրենքի տառին համապատասխան միաձայն ընտրել են թիվ 27 դպրոցի նախկին տնօրենին։ «Որևէ խնդիր այստեղ չկա։ Չեմ կարծում, որ կարող ենք գուշակություններով հարց կարգավորել»,- հավելեց նա։
