«Չինացի աղջկան» մեկուկես միլիոն դոլարով գնել է «ոսկերչական աշխարհի արքան»՝ Լոուրչենսդ Գրաֆը։ Այս մասին հայտնում է Vesti.ru-ն:
Ծագումով ռուս նկարիչ Վլադիմիր Տրետչիկովի այդ նկարը հավաքածուների սիրահարը ձեռք է բերել Լոնդոնում աճուրդի ժամանակ: Աշխատանքը, որը անվանում են նաև «Կանաչ լեդի», շատ հայտնի է շնորհիվ ռեպրոդուկցիաների, որոնք տարածվել են միլիոնավոր օրինակներով:
«Ծագումով ռուս հարավաֆրիկացի նկարիչ Վլադիմիր Տրետչիկովի իդեալական վրձնահարվածներով ստեղծված կանաչադեմ, ալ շուրթերով գեղեցկուհին իր մասին ստիպեց խոսել արվեստաբաններին ու հավաքածուների տերերին:
Bonhams աճուրդում նկարը վաճառվել է մոտ 1 մլն ֆունտ սթեռլինգով՝ նախնականից եռակի թանկ գնով:
Նկարը հեղինակը վրձնել է 1953 թ.: Հենց այն ժամանակ էլ Տրետչիկովն իր նկարները տարել է ԱՄՆ՝ ցուցադրության, և այն նկարչից գնել է Չիկագոյից մի ամերիկուհի: Մինչ օրս նկարը նրա ընտանիքում էր, և այն աճուրդի է հանել կնոջ թոռը:
Նկարի գնորդը բրիտանացի միլիարդատեր է:
«Կանաչ լեդի»-ի բնորդուհին լվացքատանն աշխատող Մոնիկա Սինգ-Լին է, ում գեղանկարիչը տեսել է փողոցում: Իսկ թե ինչ գույն է ունեցել կնոջ դեմքն իրականում, վարպետն այդպես էլ չի պատմել ոչ ոքի:
