ԱՄՆ նախագահ Բարաք Օբաման զանգահարել է Ճապոնիայի ղեկավար Սինձո Աբեին՝ ներողություն խնդրելու WikiLeaks-ի վերջին հրապարակումների համար, որում խոսվել է ԱՄՆ կողմից ճապոնացի բարձրաստիճան պաշտոնյաներին գաղտնալսելու մասին: Այս մասին հայտնում է BBC-ի ռուսական ծառայությունը:
«Նախագահ Օբաման ասաց, որ ինքը շատ է ցավում…, քանի որ այդ դեպքը բուռն վեճեր է առաջացրել Ճապոնիայում»,- լրագրողներին ասել է կառավարության մամլո քարտուղարը՝ չնշելով, թե արդյոք հաստատվե՞լ են գաղտնալսման մեղադրանքները:
Հուլիսի վերջին WikiLeaks պորտալի հրապարակած փաստաթղթերի համաձայն՝ ԱՄՆ ազգային անվտանգության գործակալությունը պարբերաբար գաղտնալսել է ճապոնացի քաղաքական գործիչներին և բիզնեսմեններին:
ԱԱԳ հրապարակած զեկույցում նշված է 35 հեռախոսահամար, որոնք, ըստ փաստաթղթերի, գաղտնալսել է գործակալությունը: Դրանց թվում են Ճապոնիայի կառավարության «VIP-գիծը», ֆինանսների նախարարության մի քանի գծերը, առևտրի հարցերով նախարարի գրասենյակը:
