Թուրքական Dünya Bülteni լրատվական կենտրոնի փոխանցմամբ՝ Քայսերիում ու Բոլուում տեղակայված կոմանդոս բրիգադները երեք տարի անց ուղարկվում են երկրի արևելք ու հարավ-արևելք, որտեղ ներկայումս ակտիվ գործունեություն են ծավալել «Քրդստանի աշխատավորական» կուսակցության (PKK) զինյալները։
Ընդգծվում է, որ Քայսերիում տեղակայված թիվ 1 կոմանդոս բրիգադն ու Բոլուում տեղակայված թիվ 2 կոմանդոս բրիգադը ահաբեկչության դեմ պայքարում Թուրքիայի զինված ուժերի ամենափորձառու բրիգադներն են։ Նրանք 1980-ական թվականներից շարունակ ուղարկվել են երկրի արևելք ու հարավ-արևելք, իսկ վերջին անգամ զորանոցներ էին վերադարձել 2012 թվականի դեկտեմբերին։
Երկու բրիգադների առաջապահ զորամասերն արդեն իսկ սկսել են հետազոտություն իրականացնել արևելքում ու հարավ-արևելքում՝ իրենց գումարտակների տեղակայման համար ժամանակավոր բազաներ փնտրելու համար։ Պլանավորված է, որ երկու բրիգադից երկրի արևելք ու հարավ-արևելք կուղարկվի ընդհանուր առմամբ 6 գումարտակ։
