Վենեսուելան ժամանակավորապես դադարեցրել է ԱՄՆ-ի հետ դիվանագիտական հարաբերությունները նորմալացնելու փորձերը՝ ամերիկյան իշխանությունների կողմից երկրի գործերին միջամտելու պատճառով: Այս մասին հայտարարել է Վենեսուելայի արտգործնախարար Էլիաս Հաուան՝ փոխանցում է BBC-ն:
Հաուայի խոսքով՝ երկու երկրների միջև հաղորդակցությունը դադարեցվել է միայն Ամերիկյան պետությունների կազմակերպության շրջանակում, մինչդեռ դիվանագիտական և հյուպատոսական հարաբերությունները մնում են անփոփոխ:
Վենեսուելայի արտգործնախարարի խոսքով՝ նման որոշման պատճառը ԱՄՆ պետքարտուղարի արևմտյան կիսագնդի հարցերով օգնական Ռոբերտ Ջեյքոբսոնի արտահայտություններն էին:
Հաուան կոնկրետ օրինակներ չի բերել, սակայն հայտարարել է, որ Ջեյքոբսոնի արտահայտությունները վկայում են Վենեսուելայի ընդդիմադիր թեկնածու Էնրիկե Կապրիլեսին աջակցելու մասին, ինչը, Կարակասի կարծիքով, երկրի ինքնիշխանության խախտում է:
Որոշ ԶԼՄ-ների փոխանցմամբ՝ Վենեսուելայի հավակնությունների պատճառ կարող է դարձած լինել Ջեյքոբսոնի՝ մարտի 15-ի համարում տված հարցազրույցը իսպանական El Pais թերթին: Նա հայտարարել էր, որ վենեսուելացիները արժանի են արդար ընտրությունների ու ազատ մամուլի, ինչը նկատելի չէ վերջին տարիներին:
Բացի այդ, չորեքշաբթի ամերիկացի գեներալ Ջոն Քելլին Կոնգրեսում հայտարարել էր, որ Վենեսուելայի տնտեսությունը անկում է ապրում, և կասկած էր հայտնել, որ Կարակասին կհաջողվի շարունակել իր դաշնակիցներին նավթ մատակարարել ցածր գնով:
