Ադրբեջանական Salam News գործակալության փոխանցմամբ, Կրոնական կառույցների հետ աշխատանքի գծով պետական կոմիտեի նախագահ Հիդայաթ Օրուջևն ապրիլի 15-18-ը գտնվել է Թուրքիայում և մի շարք հանդիպումներ անցկացրել թուրք բարձրաստիճան պաշտոնյաների հետ:
Օրուջևը Թուրքիա է այցելել Թուրքիայի Կրոնական գործերի նախարար Մեհմեթ Գյորմեզի հրավերով: Հանդիպման ժամանակ երկու գերատեսչությունների ղեկավարները քննարկել են օտարածին ազդեցությունից ընդհանուր ազգային-կրոնական արժեքների պաշտպանությանը, տարածաշրջանում կրոնական կայունությանն ու խղճի ազատության ապահովմանն առնչվող և այլ խնդիրներ:
Օրուջևին հյուրընկալել է Թուրքիայի նախագահ Աբդուլլահ Գյուլը: Հանդիպման ժամանակ կողմերը քննարկել են ազգային-բարոյական արժեքների պահպանման, հայրենասիրական ոգով երիտասարդության դաստիարակման, տարածաշրջանում կայունության ամրապնդման հնարավորությունների խնդիրները: Կողմերը գոհունակություն են հայտնել թուրք-ադրբեջանական վստահելի հարաբերությունների կապակցությամբ:
Նշվում է, որ Օրուջևը հանդիպել է մի շարք թուրք բարձրաստիճան պաշտոնյաների հետ:
Հիշեցնենք, որ պատմականորեն Ադրբեջանում տարածում ունեն իսլամի երկու ավանդական ուղղությունները` շիա իսլամն ու սուննի իսլամը: Սակայն Ադրբեջանի առաջատար կրոնական ուղղությունը շիա իսլամն է` 65 տոկոս (սուննիադավան է 35 տոկոսը): Մինչդեռ Թուրքիայում գերիշխում է սուննի իսլամը:
