Մարտի 19-20-ին Երևանում տեղի է ունեցել ՀՀ-ԵՄ ասոցացման համաձայնագրի բանակցությունների 12-րդ լիագումար նիստը: Հայկական պատվիրակությունը գլխավորում էր ՀՀ արտաքին գործերի նախարարի տեղակալ, գլխավոր բանակցող Զոհրաբ Մնացականյանը: Եվրոպական կողմից բանակցությունները վարում էր Եվրոպական արտաքին հարաբերությունների ծառայության Արևելյան հարևանության, Ռուսաստանի և Արևմտյան Բալկանների հարցերով տնօրեն Գունար Վիգանդը:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ հանդիպման ընթացքում զգալի առաջընթաց է գրանցվել ապագա համաձայնագրի կառուցվածքային ձևաչափին, ընդհանուր և եզրափակիչ դրույթներին, քաղաքական երկխոսությանը, արտաքին և անվտանգության քաղաքականությանն առնչվող ոլորտների շուրջ: Արձանագրվել է, որ համաձայնեցվել են ոլորտային համագործակցության, ինչպես նաև արդարադատության, ազատության և անվանգության վերաբերյալ բոլոր գլուխներր:
Երկուստեք գոհունակությամբ նշվել է, որ հաջողությամբ ընթանում են նաև Ասոցացման համաձայնագրի բաղկացուցիչ մասը հանդիսացող՝ Հայաստանի և ԵՄ միջև Խորը և համապարփակ ազատ առևտրի գոտի հիմնելու շուրջ բանակցությունները, որոնց հաջորդ փուլը տեղի կունենա ապրիլին Երևանում:
Կողմերը վերահաստատել են իրենց մտադրությունը մինչև 2013 թ. Արևելյան գործընկերության Վիլնյուսի գագաթնաժողովը ավարտել Ասոցացման համաձայնագրի` ներառյալ Խորը և համապարփակ ազատ առևտրի գոտի հիմնելու շուրջ բանակցությունները:
