Հատուկ քննչական ծառայությունում հարուցված քրեական գործը՝ մայիսի 13-ին նախագահականի մոտ ոստիկանության աշխատակիցների կողմից բռնությամբ զուգորդված պաշտոնական լիազորություններն անցնելու ենթադրաբար կատարված դեպքի մասով, կարճվել է:
«Առաջին լրատվական»-ի հետ զրույցում Իրինա Ղազարյանը և Նանա Մուրադյանը նկատեցին, որ այդ մասին իրենց ծանուցել են օգոստոսի 12-ին: Նրանք նշեցին, որ հենց այսօր դիմելու են դատախազություն՝ վերադասության կարգով բողոքարկելու համար. «Պիտի ամպայման մեզ ծանր վնասվածք հասցնեին, սպանեին, որ լիներ բռնություն են կիրառել, միայն լրատվամիջոցների նկարածները, որ նայեն, կտեսնեն, բավարար ապացույցներ ինչքան կան»,- պնդեցին նրանք:
Նրանք պատմեցին, որ հենց սկզբից էլ գիտեին՝ ոչ ոք չի պատժվելու, քանի որ «վերևների» հրամաններով են գործել: «Առաջին օրվանից ասել ենք, ոչ ոք պատասխանատվություն չի կրում իր արածների համար, մենք ապրում ենք հրեշների, հանցագործների ու մարդասպանների մեջ»:
Տիկին Նանան հիշեցրեց, որ ոստիկաններից մեկը մայիսի 13-ին դիտավորյալ ճմկտել էր իր կուրծքը, առնվազն երկու ոստիկաններ էլ քաշքշել էին, բայց քանի որ կապտուկ չի եղել, և փորձաքննությունը ասել է, որ փող չկա մամոգրաֆիայի համար, գրել են, որ վնասվածք չկա:
Տիկին Իրինայի դեպքում չէին կարող եզրակացնել, որ վնասվածք չի եղել, քանի որ թևերի կապտուկները, ոստիկանի մատների տեղերը առկա են եղել, ուստի եզրակացություն է եղել, որ վնասվածք կա:
«Բայց քննիչը ասում ա էտի հեչ, ինչի՞ հեչ, ցավերի մեջ, մեր երեխեքին սպանեն, գլուխները ուտեն, մենք ծեծվենք, մենք ինչու՞ ենք փողոցում, թող մեր տղաների սպանողներին գտնեն, մենք էլ սուս մնանք, մենք այսպես չենք թողնելու, եթե պետությունը չանի, մենք կանենք»,- նշեց նա:
Նանա Մուրադյանը նաև նշեց, որ իրենց կարծես թե ծաղրում են, գրել են, որ քրեական հետապնդում չի իրականացվելու նաև Նանա Մուրադյանի նկատմամբ. «Մեզ ծեծեն, մեզ մի հատ էլ դատեի՞ն»:
Մանրամասները՝ տեսանյութում:
