Georgia Online-ի փոխանցմամբ՝ Վրաստանի պաշտպանության նախարար Թինա Խիդաշելին, ելույթ ունենալով Ամերիկյան խաղաղության ինստիտուտում, հայտարարել է, որ երբ ՆԱՏՕ-ն 2008 թվականին հրաժարվեց դաշինքի ընդլայնումից, այդ ժամանակ էլ սկսվեց պատերազմը։
Նրա խոսքերով՝ Ռուսաստանը ՆԱՏՕ-ի այդ որոշումն ընդունեց որպես «կանաչ լույս»՝ Վրաստանի դեմ գործողություններ սկսելու համար. «Ապա՝ 2009 թվականին, աշխարհն ասաց՝ լավ, եկեք մոռանանք ամեն բան և սկսենք նոր քննարկումներ, նոր գործընկերություն։ Վերանայվեց քաղաքականությունը և դրան հաջորդեցին մի շարք այլ գործողություններ։
Ռուսաստանին համարեցին գործընկեր, սակայն հետագայում սկսվեցին ուկրաինական դեպքերը։ Կարծում եմ, որ եթե օգոստոսյան պատերազմից հետո կային պատրանքներ, որ Ռուսաստանը կարող է լինել գործընկեր, ապա Ուկրաինայի դեպքերից ու պատերազմնից հետո բացարձակապես հստակ է, որ պետք չէ գործընկերություն ակնկալել Ռուսաստանից»։
Խիդաշելին պատմել է նաև Վրաստանում ռուս զինվորականների կողմից սահմանային փոփոխությունների ու Ռուսաստանի կողմից բխող ընթացիկ սպառնալիքների մասին։ Խիդաշելիի խոսքերով՝ Վրաստանի կառավարությունը թույլ չի տա, որ իր տարածքում տեղի ունենա ևս մեկ պատերազմ։ Նա ընդգծել է, որ Ռուսաստանի հետագա գործողությունները կհստակեցնեն Վարշավայում կայանալիք ՆԱՏՕ-ի գագաթնաժողովի արդյունքները։
