2008թ. Մարտի 1-ի զոհ Տիգրան Խաչատրյանի մայրը՝ Ալլա Հովհաննիսյանը, չի հավատում, թե ԱԺ-ում պատգամավորները կողմ կքվեարկեն 2008թ. մարտի 1-2-ի իրադարձություններն ուսումնասիրող խորհրդարանական նոր ժամանակավոր հանձնաժողով ստեղծելու նախաձեռնությանը:
Ալլա Հովհաննիսյանն «Առաջին լրատվական»-ի հետ զրույցում մտավախություն հայտնեց, որ ինչ-որ պատճառաբանությամբ հանձնաժողով չի ստեղծվի, կասեն, թե երկրում լարված իրավիճակ է, նոր լարումներ պետք չեն:
«Կարծում եմ, որ չի ստեղծվի այդ հանձնաժողովը, իսկ եթե նույնիսկ ստեղծվի, թույլ չեն տա աշխատել: Պարոն Ջհանգիրյանը կկարողանա ապացուցել, որ անօրինական է եղել ՀՔԾ աշխատանքը: ՀՔԾ անգործության բացահայտումը Մարտի մեկի գործով մեզ շատ կօգնի ՄԻ Եվրոպական դատարանում, որովհետև մեր գործը Եվրոպական դատարանում է և այս տարի կլսվի: Բայց էլի եմ ասում, որ թույլ չեն տա, որ հանձնաժողով ստեղծվի:
Ես շատ լավ գիտեմ, թե իմ երեխային ով է սպանել: Փաստահավաք խումբը մեզ ապացուցել է, բայց իմ նպատակը կոնկրետ կրակողին դատապարտված տեսնելը չէ՝ նա հրաման է կատարել: Իսկ հրամանը եղել է ապօրինի: Ինչո՞ւ են ոստիկանությունը և բանակը կրակել խաղաղ ցուցարարների ուղղությամբ, պետք է վերևից ներքև՝ բոլոր պատասխանատուները բացահայտվեն»,- նշեց Ալլա Հովհաննիսյանը:
Նշենք, որ Մարտի մեկի զոհ Տիգրան Խաչատրյանի մայրը՝ Ալլա Հովհաննիսյանը, մեկնել է Բելգիա և հույս ունի վերադառնալ Հայաստան այն ժամանակ, երբ Հայաստանի ժողովուրդը տոնած կլինի իր հաղթանակը:
Հիշեցնենք, որ անցած ուրբաթ օրը ԱԺ պետաիրավական հարցերի մշտական հանձնաժողովը դրական եզրակացություն տվեց 2008թ. մարտի 1-2-ի իրադարձություններն ուսումնասիրող խորհրդարանական նոր ժամանակավոր հանձնաժողով ստեղծելու՝ ՀԱԿ խմբակցության ներկայացրած նախագծին: ԱԺ որոշման այդ նախագիծն ընդգրկված է խորհրդարանի այս քառօրյա նիստերի օրակարգում: Կոալիցիոն խմբակցությունները նույնպես կողմ են, որ այն ստեղծվի:
