Հայաստանի Ֆրանսիական համալսարանի ղեկավարության կողմից մերժված դերասան Վարդան Պետրոսյանը, ով ինչպես հայտնի է միացել է Ազատության հրապարակի շարժմանը, նախօրեին հանդիպում է ունեցել Սլավոնական համալսարանի ուսանողության հետ, ընդ որում` ռեկտոր Արմեն Դարբինյանի հրավերով:
Հանդիպմանը ներկա են եղել նաև ուսանողներ Ֆրանսիական համալսարանից, ովքեր ներողություն են խնդրել իրենց համալսարանի անունից:
«Սլավոնական համալսարանի ռեկտորն ասաց` եթե Ֆրանսիականը չի ուզում իր դահլիճը տա, համեցեք, ես մեր դահլիճը կտամ ու կտամ: Նստած խոսում էինք, կիսվում էինք, ես երգեր եմ երգել, ուրախացրել եմ, տխուր հարցեր ունենք, դառը հարցեր ունենք, զվարճալի բաներ կան, վերջիվերջո, խնդիրներ ունենք միասին: Շատ-շատ լավ հանդիպում էր, շատ հուզիչ»,- «Առաջին լրատվական»-ի հետ զրույցում ասաց դերասանը:
Մեր հարցին` քաղաքականությունից խոսեցի՞ք հանդիպման ժամանակ, դերասանը պատասխանեց. «Իհարկե, ամեն ինչից խոսեցինք: Էս շարժումից էլ խոսեցինք, «բարև»-ից էլ խոսեցինք: Իսկ ինչի չպետք է խոսեինք, բայց խոսել քաղաքականությունից հո չի նշանակում` ուղղորդել ուսանողությանը ինչ-որ մի ուղղության, բոլորովին ոչ: Եթե ուսանողի մոտ հարցեր են առաջանում, պատասխանների կարիք կա, ինչ կա վախենալու»:
