«Մարզադաշտի սնանկացման սկիզբը Խաչատրյան Գագոն էր, վերջը՝ Ծառուկյան Գագոն»,-«Առաջին լրատվական»-ի հետ զրույցում հայտնեց «Հրազդան» մարզադաշտի սեփականատեր, ՀՀԿ-ական պատգամավոր Աշոտ Աղաբաբյանը՝ անդրադառնալով մարզադաշտի սնանկացման մեղավորներին։
Մարզադաշտը սնանկ է ճանաչվել երկու ամիս առաջ։ Աղաբաբյանը սնանկացման սկիզբը համարում է հարկային մարմնի կողմից 60 միլիոն դոլարի չափով տուգանքը, ապա Գագիկ Ծառուկյանի՝ Առինջում տոնավաճառ բացելը։ Աղաբաբյանը վստահեցնում է, թե Հրազդան տոնավաճռը մարզադաշտը պահելու միջոց էր, ոչ թե շահութաբեր բիզնես։
Թե ինչ է լինելու մարզադաշտի ճակատագիրը, դեռ չի կարող ասել իշխանական պատգամավորը, քանի որ սպասում է հարկային մարմնի դեմ իրենց դատավճռին։ Եթե 60 միլիոն դոլարը կարողանան հետ ստանալ, առողջացման ծրագիրը կլինի, եթե ոչ, ամենայն հավանականությամբ կվաճառվի։
«Եթե սնանկացման է գնացել, նաեւ կարող է վաճառվել, թող երկու ախպերներով՝ երկու գագոներով փող դնեն, գան առնեն»,-առաջարկեց Աղաբաբյանը։
